JACWR-i Chief Minister aser Naga Hoho dangi shidi zülu

Kohima, August 15 (TYO): Nagaland nung Joint Action Committee on Women Reservation (JACWR)-i Nagaland Chief Minister aser Naga Hoho President dangi shidi balala züluogo.
State sorkari 33% women reservation nung ajemdaker ULBs indang election agitsü telemtetba agiba atema kanga pelar ta JACWR-i Chief Minister dangi züluba shidi nung shia lir aser külen Naga Hoho dang Cabinet telemtetba anema noktakba magizüker ta parnokisa metetdaktsü.
JACWR Convenor Abeiü Meru aser Co-Convenor Dr Rosemary Dzuvichu na den züngsem 6-i züluba shidi nung Chief Minister aser par Cabinet-i Nagaland nung tetsür nem shilem 33 balaka yutsür Municipal election agitsü telemtetba agiba atema pelaba metetdaktsü.
Ajisüaka, Naga Hoho-i Chief Minister dangi shidi ka nung Cabinet telemtetba mapa küma meinyaki atatsü atema ashiba magizüker. Kechiyong Supreme Court-i tetsürtem urban governance nung shilem agitsü temeten agütsüogo. Naga Hoho-i telemtetba magizükbaji tetsürtem indang Constitutional rights anema noktakba lir, ta JACWR-isa ashi.
Tetsürtemi asen jilatem aser state renlokba nung külemi shilem agitettsü atema State sorkari tekaratiba nung municipal elections agitsü imlar, ta parnokisa CM dang ashi.
JACWR-isa Naga Hoho President dangi züluba shidi nung ashiba agi, Naga tsürtemi Supreme Court dang temeten meshi aser Interim order ajanga Single Judge Order reprangshimer oshidang agütsü.
Anungji, Naga Hoho-i shisa kaa Municipality aser Town Council tem nung tetsürtemi shilem agitsü agizüktsü aser parnoki telatetba agia aliba meyipa reprangshitsü imlar, ta parnokisa shidi nung shia lir.
Naga tsürtemi kanga melenshiogo aser town o municipal elections nung shilem agitsü renema lir, ta JACWR-isa Naga Hoho dang ashi.