Jada Smith o Spike Lee nati Oscars sentong nung shilem magitsü

Los Angeles, January 19 (Agencies): Nungtugu film yanglur, Spike Lee aser actress Pinkett Smith nati longkak aita taruba February ita 28 nü agitsü ayongba 2016 Oscars sempet agütsütsü sentong nung shilem magitsü lemtetba osang ka metetdaktsüogo.
Taküm agi kümnabuba tashi Oscars sempet agütsütsü asoshi shimer actor aser director-tem rong nung tanak nisung ka danga densema maliba atema longkak aita Oscars sentong nung shilem magitsü lemtetba olen ka Spike-i metetdaktsü.
Hollywood actor & singer, Will Smith kinüngtsü, Jada-ia Oscars sentong nung shilem magitsü lemtetba osangji Facebook ajanga metetdaktsüogo.
“Oscar sempet agütsütsü sentong kümnabuba tashi nung shimer nisung 40 rong nung tanak nisung ka danga madenba ya tesüngmangtsüka lir. Tanak nisungtemibo film-tem nung tangar ama junga shilem magiteter asü?” ta tesüiba mapang Oscar sempet agizüker African American, Spike-i Instagram ajanga Academy Awards Tir aser Board of Governors den temulung masüba olen ka benokba osang jangjaogo.
“Nütsüng yongsük ajema aliba nisungtema Oscars sempet agütsütsü asoshi shimer rong nung densema alitsüla,” ta yaküm, 2015 küm taküm piyong film yangluba aser acting sabang nung tongti shilem agiba nüngtem nung Oscar sempet agizüksang, Spike-i shisem.
Asayamenür, Chris Rock-i ania agitsü renemba 2016 Oscars sempet agütsütsü sentong nung temesung nisungtem dang Oscar sempet agütsütsü asoshi shimoka aliba osang meteta akümba sülen tanak aser nütsüng yongsük ajema alir actor, producer aser director-tem densema, nüburtem kanga dang mepelai akümba osang jangjaogo.