‘Jai Shri Ram’ ya rara adokdaktsüba oren ka kümogo: Celebrities

New Delhi, Chiteni/July 24 (Agencies): India linük nung loktii nisung züksetba aser tamangba yimsü nung ajemdaker minority tem reshikangshiba kanga bulua atalokba tebilemtsü nung ajemdaker film yanglur, activists aser artist 49-i Ato kilonser, Narendra Modi dangi yimjak nung shidi ka züluogo.
Iba shidi nung sign süa alirtem rongnung nüngtugu film directors Adoor Gopalkrishnan, Shyam Benegal, Mani Ratnam, Anurag Kashyap aser actors- Aparna Sen, Konkona Sensharma aser Riddhi Sen nunger densema lir.
Parnoki shidi ka ajanga Ato kilonser, Modi dang loktii nisung züksettsüsa alsalentong yanglurtem nem temerenshi agüjang, ta mepishia lir.
Parnokisa ashiba agi, Parliament nung Modi-i linük nung loktii nisungtem züksetba tatalokbatem aitsüogo, ajisüaka iba kija jagi meperitsü.
Shidi nungji parnoki Modi dang yamai shia lir, “Nisung tepsetba ken otem nung bail magütsüi taküm piyong tepoukdak ayutsü obendang agütsütetra kechiba loktii nisung züksetba atema kasa obendang magütsütsü, kechiyong iba ya-a aibelen tuluka lir. Senso shinga par/lar linük nung tetsübu nung malitsüla.”
Parnokisa ashiba agi, ‘Jai Shri Ram’ oren ya rara adokdaktsüba oren ka kümogo.
“Majority pur (Hindu nunger) atema Ram ya kanga temeshi, anungji Ram tenüng menüktsüba anentsüla,” ta parnoki shidi nung shia lir.
Mongolbarnüa arishi küm 35, Muslim nunger tebur kati, pai ‘Jai Shree Ram’ mashiba agi pa dak azük, ta shia West Bengal nung aliba police station ka nung ken o ka benoka liasü.
Taoba ita Jharkhand nunga lokti kati nisung kati kiset shiruru auya ta tai tonglokja azükba sülen hospital ka nung asü. Iba tatalokba indang video ka nung Muslim nunger Tabrez Ansari dang kangshia ‘Jai Shri Ram’ ta shidaktsür.
Modi dangi züluba shidi nungsa film yanglurtem, activists aser artist temi India nung loktii nisung züksetba tatalokbatem indang shia lir. National Crime Records Bureau (NCRB) data nung ajemdaker parnoki Modi dang, 2016 küm Dalit nunger anema inyakba tatalokba 840 liasü aser item ama tatalokba kanga bulua akumer, ajisüaka item ken otem nung aitsübabo kanga ajema kümdar.
“January 1, 2009 nungi October 29, 2018 tsüngda tamangba yimsü nung ajemdaker tesempa agi inyakba tatalokba 254 liasü. Item ken o nung nisung 91 tepset aser nisung 579 yirua liasü (Factchecker.in database (October 30, 2018),” ta shidi nung shia lir.
Parnokisa, 2014 küm Centre nung BJP sorkar aruba sülen item ama tatalokba shilem 90 agi timba kümogo, ta metetdaktsüogo.