Jail-i aitsü saka senchi magütsütsü: Ravi Shankar

New Delhi, March 10 (Agencies): Tanü Art of Living tentetsang, Sri Sri Ravi Shankar-i pai ‘environmental’ senchi sen kata magütsütsü saka jail-i aitsü melunga lir, ta ashi.

Delhi nung World Culture Festival amungtsü atema sentong aliba tesem nung ali tzü mopung raksatsüba atema yashi pa dang senchi crore 5 meshi saka pai ibaji agütsütsü memelunger.

“Onoki kecha tai meinyak. Onok dak tarak mali aser yamaji dang alitsü. Onoki tepoukdakibo aitsü saka sen kata magütsütsü,” ta Ravi Shankar-i ashi.

Ano külen iba ama mangatettep onük liaka Ato kilonser, Narendra Modi-ibo Sri Sri-i ayongba sentong nung adentsü lemtetogo.

Art of Living-i ayonga anogo asemnü World Culture Festival Yamuna ayongkümlen asüng tenzüktsü. Yashi National Green Tribunal (NGT)-i Sri Sri’s Foundation aser sorkar tentet aika dang senchi meshiogo.

NGT-i Ravi Shankar indang foundation dang, iba senchiji Hokolbarnü tashi nung agütsütsüla, ta shiogo. NGT-isa Hokolbarnü tashi nung senchiji magütsüra ozüngi melaba ama inyaktsü, ta metetdaktsüogo.

Ravi Shankar-i twitter ajanga par foundation-i NGT obendang nung melung masür ta shiogo. Paisa yimtenren lenirtem dang iba sentong ya yimtenren tajangzük atema mamshidaktsüner, ta mepishiogo.

“Süngdong kata melensük. Süngdongtemji tera dang ayipshi aser onoki lenden süsümedemshiogo,” ta pai ashi.

“Iba ya Cultural Olympics ama asütsü. Alima ajaklen nungi shilem agir 37,000 sabang ka nung lungjemtsü. Iba sentong ya nisungtem sentakteptsü atema lir. Iba ama sentong ka ya pelaa agizüktsüla,” ta pai NDTV dang ashi.