New Delhi, January 7 (Agencies) : Pathankot amaktsü tasaji Jaish-e-Mohammad tanishir Maulana Masood Azhar-i atonga inyak ta Intelligence agencies-i osang jangjaogo.
Iba tasa ya Pakistan kübok Bahawalpur nung yanglu, ta intelligence osang ajangasa metetdaktsü.
India-i Pakistan den Pathankot amakertem len tuyur Jaish-e-Mohammad(JeM) züngsem pezü metetdaktsüogo aser parnok indang phone number tem agütsüogo.
Kiralongrartem len tuyur pezüji, Abdul Rauf Asghar (Jaish tanishir Azhar tenu), Ashfaq Ahmed, Haji Abdul Shaqur aser Kashim Jaan nunger lir.
Kiralongrartemi jembishinüba phone number temji Pakistan number tem liasü aser item nungber ji tesüiba mapangtem nungi mita liasü. Item number pezüji onoki jangjatetba Jaish tanishir pezüi amshi, ta intelligence ketdangser kati ashi.
“Pakistan-i item phone number amshirtem tsüngsü bushitsü imlar. NSA Ajit Doval-i Pakistan ketdangser Nasser Khan Janjua nem kuli agütsüba nung ajemdaker Pakistan-i item nisungtem bushia aputsüla” ta ketdangserisa ashi.
Ano külen, tanü India-i Pakistan dang Pathankot amakba ken o atema parnoki mapa inyak nungdang foreign secretary jenjang nung olemtep akatsü ta metetdaktsü.
“Iba onük atema Pakistan-i dang telemtetba agitsü. Pathankot kiralongraba mapa ajanga arrtsü adena kiralongra mapa inyakba onük lepa bener aruogo” ta Ministry of External Affairs otongdar Vikas Swarup-i osangbener dang ashi.
“Pakistan densema India-i kidangsüa aliba linük ajak den tesentaktep tajung yunür” ta paisa ashi.
You must be logged in to post a comment Login