Jaishankar aser US NSA na linük tesentaktep ken o jembi

New Delhi, April 28 (Agencies): India Foreign Secretary, S Jaishankar-i US National Security Adviser, Susan Rice den ajurutepa alima tzümopung melenshiba, shishilembaba aser defense densema onük aika nung India-US na amalitepa inyaktsü jembiogo.
“Rice aser Jaishankar nati alima tzümopung melenshiba, shishilembaba aser defense nung linük ana amalitepa inyaktsü atema jembiogo,” ta yashi White House nung National Security Council otongdar, Ned Price-i metetdaktsü.
Tena senden amendang Paris nung tezüngzüktep agiba indang, civil-nuclear nung amalitep, multilateral export control regimes nung India züngsemtsü atema pusemba, Global Health Security Agenda atema meratem aser security o kiralongraba anema raraba nung amalitepa inyaktsü atema jembiogo, ta Price-i sangdong ka ajanga metetdaktsü.
Tang Indian Foreign Secretary-i Washington semdanga lir, aser pai tanü Deputy Secretary of State, Anthony Blinken-a ajuruogo.
Taküm June tetenzüklen Ato kilonser, Narendra Modi-i United States semdangtsü lia tang India ketdangseri US semdangogo. Ajisüaka iba sentong dak sentakba nung New Delhi mesüra White House napronglai official sangdong agüja mali.
Taoba hopta America nung yimtenren lenir pezüi US House of Representatives Speaker, Paul Ryan dang US Congress külem senden nung o jembitsü atema Modi jaoktsü mepishiogo. Iba senden ya June 7 aser 8 nü agitsüa akok.