Jaishankar-i Lanka, Vietnam, Mongolia, Bangladesh lenirtem ajuru

Bangkok, August 02 (Agencies): Hokolbarnü Bangkok nung External Affairs Minister, S Jaishankar-i Vietnam, Sri Lanka, Mongolia, Timor Leste aser Bangladesh nungi Foreign Minister tem ajurua jurila senden nung linük tesendaktep dak sendakba onüktem jembiogo.
ASEAN-India ministerial senden, 9buba East Asia Summit Foreign Ministers’ senden, 26buba ASEAN Regional Forum senden aser 10buba Mekong Ganga Cooperation ministerial sendentem nung adentsü atema Jaishankar tang Thailand yimtiba, Bangkok-i oa lir.
Jaishankar-i twitter ajanga, “Tanünübuba anogo junga tenzükogo,” ta metetdaktsü.
“Kanga tongtibang kiyonger, akang tembar. FM @MFA_SriLanka Tilak Marapana ajurua kiralongra anema longjemer raratsü atema jembiogo,” ta pai metetdaktsü.
Paisa Timor Leste Foreign Minister, Dionisio da Costa Babo Soares ajurua lenla ajak nung amalitepa inyaktsü atema jembia liasü. Jaishankar-i Mongolia Foreign Minister, Damdin Tsogtbaatar den-a linük ana dak sendakba onüktem nung o lemtepa liasü.
Jaishankar-i Bangladesh Foreign Minister, Dr AK Abdul Momen ajuruba mapang nung India nunger indang “neighbourhood first” mapatong metetdakja liasü.
Jaishankar-i twitter ajanga, “Bangladesh Minister Dr AK Abdul Momen den senden junga menogo. Tekaraba nung Dhaka semdangtsü yongyar. Neighbourhood first!” ta metetdaktsü.
Mezüngbuba anogo nung Jaishankar-i ASEAN-India Ministerial senden aser Mekong Ganga Cooperation (MGC) ministerial senden na nung jembi aser China, Japan, UK, New Zealand aser European Union densema linük ter nungi Foreign Minister tem ajurua liasü.