Jaitley dang nungi linük meimba angazüktsü menüngdakar: Yechury

New Delhi, March 21 (Agencies): Taoba mapang US Tir, George Bush-i ‘nenok onok dena lir, mesüra kiralongrartem den dena lir’ ta jembiba o den kasa Union Finance Minister, Arun Jaitley-i jembiba dak sentakba nung tanü Hombarnü CPI(M) General Secretary, Sitaram Yechury-i, “Onoki BJP dang nungi linük meimba indang mangazüktsü,” ta ashi.

January ita JNU campus nung sentong ka alidang kaketshirtemi linük anema yimyim ayim ta tai tonglokja ken o tulu adokba sülen linük yimtenren nung aitsütepba mapang ka nung Yechury-i, “BJP-i linük meimba onük nung jembibaji Bush-i jembiba nüngtugu o- ‘nenok onok den lir mesüra kiralongrartem den lir’ den kasa lir. BJP pusemertemji linük meimertem aser parnok anemertemji linük anemertem. Ajisüaka onoki BJP dang nungi linük meimba indang mangazüktsü,” ta ashi.

Tanep Union Finance minister Arun Jaitley-i, “O sademsadema jembiba aser linük meimba naji sentaktepa mali, aser linük Temzüng ajanga melung masürtem aser memelungertemi sademsadema jembitsü melar saka linük raksatsüsa jembitsü memelar,” ta jembia liasü.

“Linük meimba tangatetba ajanga asen tangatetba aser teinyaktsütem len anir,” ta paisa ashi.