Jaitley-i HC nung Kejriwal anema tenüng menüktsüba ken o benok

New Delhi, December 21 (Agencies): Tanü Hombar nü Union Finance Minister, Arun Jaitley-i Delhi High Court nung Delhi Chief Minister, Arvind Kejriwal den AAP lenir tangar nisung pongu anema parnoki pa aser par kibong züngsemtem tenüng menüktsüba ken o ka benokogo.

Jaitley-i Kejriwal aser AAP lenirtem – Kumar Vishwas, Ashutosh, Sanjay Singh, Raghav Chadha aser Deepak Bajpayee nungeri pa tenüng menüktsüba atema senchi sen crore 10 meshia ken o benok.

Kejriwal densema AAP lenirtem kari Delhi cricket tentet, Delhi and District Cricket Association (DDCA) nung Jaitley küm 13 tashi Tir inyakba mapang ochimashibaren liasü ta tai tongloktsüba mapang ka nung Jaitley-i iba pa tenüng menüktsüba ken o benokogo.

Yashi Union minister Jaitley-i, “ni Kejriwal aser AAP lenirtem anema Patiala House court nung temzüng alema inyakba ken o benoktsü” ta shiogo.

Pai Kejriwal aser AAP lenirtem dang tatok meshitsüla ta mashi mesüra jelia kecha memetetdaktsü saka iba ken o ji indangindanga okadak benoka liasü.

Ano tanga osang ka nung tanü Kejriwal-i, Finance Minister Arun Jaitley-i pa aser AAP lenirtem anema tenüng menüktsüba ken o aser temzüng alema inyakba ken o tem benokba ajanga Aam Aadmi Party metsübutsü, ta ashiba den külemi Jaitley dang pai aibelena maliba kuliji bushisüngdangba commission nem agütsütsüla, ta ashi.

Kejriwal-isa, Delhi and District Cricket Association nung ochimashi bushisüngdangtsü atema Delhi sorkari tentetba Commission of Inquiry den Jaitley-i yaritepa inyaktsüla, ta ashi.

“Jaitley-i onok anema ken otem benokba ajanga onok tsübudaktsütsü memerangtsüla. Onoki ochimashi anema maneni raratsü. Jaitley-i Commission of Inquiry den yariteptsüla aser yangji pai pa aibelena maliba kuli sayutsüla,” ta Kejriwal-i twitter ajanga ashi.

“Pai minister khurettem toktsür court tem nung mapang intoker. Ajisüaka tangbo onoki iba nung yagi matsüngshitsü. Onoki maneni DDCA onük nung pa mechioktsü,” ta AAP lenir Sanjay Singh-i ashi.

Jaitley-i onok tepouktaki yoktsü atema amokmeren masütsüla, saka onoki benokba tasüngdangbatem langzütsüla, ta AAP lenir Ashutosh-i ashi.

Ano külen DDCA nung ochimashi ken o bushisüngdangtsü atema taoba mapang Solicitor General, Gopal Subramanium kübok commission ka tentettsü atema Delhi Cabinet-i agizükogo.

Iba dak alia Cabinet-isa asüng Bodhbar nü Delhi Assembly senden ka ayongogo.