Jaitley-i SAARC Finance Minister senden nung madentsü

New Delhi, August 16 (Agencies): SAARC Finance Minister tem senden nung Pakistan-i India Finance Minister, Arun Jaitley pelaa agizüktsü tebilemba lir ta osang jembiba mapang ka nung tanü Arun Jaitley-i August 25-26 anogotem nung ayonga aliba SAARC Finance Ministers’ senden nung madentsü lemtetogo.
Sorkar osang ka nung ajemdaker osang ka ajanga, iba senden nung Economic Affairs Secretary, Shaktikanta Das-i India tenüng nung adentsü, ta metetdaktsü.
Taoba ita Pakistan nung SAARC Home Ministers’ senden nung Union Home Minister, Rajnath Singh dena liasü, aser hopta ishika tsüngda Finance minster tem senden ya Pakistan nungsa akatsü.
Iba senden nung Rajnath-i, kiralongraba pusemba linüktem anema sashia inyaktsüla, aser kiralongrartemji taküm tenla agütsürtem ama metushitsüla, ta jembia liasü.
Senden nung Rajnath-i onük jembibaji osangkakettem nung madokdaktsütsü atema Pakistan-i media nokdanga liasü.
Parliament nung Singh-i, “Ni jembiba onükji live tangoker asü masüar ni mejangjar. India nungi aruba DD, ANI nungi media aser PTI osangbenertem telungi aittsü memela,” ta metetdakja liasü.
Iba mapang nung Pakistan-i Rajnath junga anepalu masü, ibayongji pai SAARC ministers chiyungba sentong nunga medeni New Delhi-i meyipa aru.
Pakistan Finance Ministry ketdangsertem osang ka ajanga ashiba agi, Bangladesh dak alaka SAARC Finance Minister senden nung züngsem linük ajak adentsü ta metetdaktsüogo.