Jaitley-i Sikh nunger nokinketer Banda Bahadur nüngtem nung ‘silver coin’ sayatsü

June 21, 2016 nü New Delhi nung Union Minister for Finance, Corporate Affairs & Information & Broadcasting, Wb. Arun Jaitley-i 300bua ‘Martyrdom Day’ amongnü Sikh nunger nokinketer Banda Bahadur nüngtem nung ‘silver coin’ ka sayatsüogo.

New Delhi, June 21 (Agencies) : Sikh military commander Banda Singh Bahadur bilemteta amongba, 300buba ‘martyrdom day’ nung union Finance Minister Arun Jaitley-i Banda Bahadur nüngtem nung silver coin sayatsüogo.
“Khalsa otsü ya tasü taitertem otsü lir aser iba otsü ajanga nüburtem kanga ajungmesor,” ta Minister Jaitley-i iba cion sayar külen sentepa alirtem dang ashi.
Iba coin ajanga Banda Bahadur-i taküm tenla agütsüba bilemtettsü, ta Jaitley-i ashi.
Sikh atema taküm bendanga agüja rarasang, Banda Bahadur indang documentary ka yanglu nung kanga ajungtsü, kechiba süra Sikh nunger aikati Sikh nunger otsü jangja memetet, ta pai ashi.
Küm 300 tejakdang Banda Bahadur-i Mughal sepaitem den raraba mapang pa taküm bendanga agütsüba Jaitley-i telok dang ashi.
Banda Bahadur-i par nisung sobaliba aser akhüm mesamadaktsütsü mechi 1710 küm pa yimsüsüba kübok Mughal nungertem akok. Ajisüaka 1716 küm pa arishi küm 46 asüba mapang Mughal nungeri pa Delhi nung apu.
Punjab nung 2017 assembly election atongtsü ita ishika lia pa nüngtem nung iba silver coin sayatsür.
Hopta ishika tejakdang Arvind Kejriwal-i aniba sorkar-i Delhi nung aliba Barapulla flyover, Banda Singh tenüng jaloktsütsü, ta osangkaket ajanga sangdongogo.