Jakhama nung ‘Jakhama Day’ among

Jakhama, January 16 (TYO): 29buba Jakhama Village Day January 16, 2019 nü Jakhama Local Ground nung mongogo; iba sentong nung tongti o jembirji Retired senior Entomologist, Ketholeho Kulnu liasü, ta osang ka ajanga metetdaktsü.
Iba sentong nung jembidang Ketholeho Kulnu-i, Jakhama yimer nem arem, ozü sangno aser shiruru balala moaja lir, aser Tsüngrem temeim ajanga iba yim lenla aika nung renlokogo, ta metetdaktsü.
Paisa lokti dang tetsü-tebou nungi senmangba yimya tajungtimji wazüka ayutsü aser benshitsü ayongzük.
Jakhama nung aliba shisaliok rejutem ajanga yimeri maongka balala anguba metetdakja pai, iba ya kaketshirtem atema dang masü saka yimtsüng rongsenkettsüng atema-a maongka lir, ta ashi.
Iba dak sendakba nung pai yimertem dang kaketshirtem nem security aser facilities agutsütsü ajungshi.
Dzükou valley semdangertem, Hornbill festival-i aoertem-i iba yim ajanger aser NH-29-a iba yim ajanger, anungji Jakha jila ya lenmang aisü nung service ajung agutsütetba jila ka akumtsüsa jenjang ka nung lir, ta paisa metetdaktsü.
Paisa yimsüsürtem dang Village Council omen ‘Truth and Victory’ nung ajemdaker oshishia alitsü aser pei teinyaktsü shilem junga inyaktsüla, kechiyong yim terenlokji nenok dak keta lir, ta ashi.
Jakhama Day anogomong nung Governor’s Best Teacher award winner, Zhokhovi Kulnu, Ane Khieya EAC, NPSC 2018, Rokosetuo Tetso EAC, NPSC 2018, Vimetsul Tase, Gold medallist 33rd Kings Cup championship (Korat Thailand) aser Visakhonuo Kulnu HSSLC top number 4 nunger nem tetushia agüja liasü.
Iba sentong tenzüka Rev. Zapovil Sophie-i sarasadem aser Jakhama Village Chairman, Dr. Nolesel Zhotso-i lokti pelaa agizükba o jembi. Kasa sentong nung Kezhokhoto Savi-i ken ka aten aser yimdak kiyong tipronglai sobaliba ken aten.