Jakhama nung MGNREGA water reservoir tank semzüktsü

Kohima, April 27 (TYO): Jakhama sensotem atema tanü Jakhama village nung RD Secretary, Kelei Zeliang IAS-i MGNREGS Special Project 2016-17 kübok tzü litre 120,000 capacity water tank reservoir ka semzüktsüogo.
Iba project nung sen lakh 20 shi indok aser iba reservoir ajanga St. Josephs College, Loyola Higher Secondary School aser Jakha jila tesemtem ayimjemtsü.
Iba sentong nung jembidang Kelei-i, iba ya department aser yim atema teinyaktetba tuluka lir, ta ashiba den külemi iba project mapang shitak nung takok ngua tembangba atema construction committee aser Village Council nem tenüngsang agütsü.
Paisa, RD department-i lenla ajaklen terenlok alitsü atema kibok shia taküm jenjang tajungba kümdaktsütsü asoshi rangloker inyaker, ta metetdaktsü.
Paisa tesem nung alirtem dang, cardamom (elaichi) tsünutsüla aser ak ajeptsüla, kechiyong iba tesem ya item project inyaktsü atema tapet, ta metetdaktsü.
“Ner yim den apet project inyaktsüla, nenoki meranga inyakba ajanga süngjang tajung tangtsütsü,” ta paisa shisem.
Project osang metetdakja Ar. Zavishio Khieya-i, water reservoir ya RCC lir aser bonglang den wall ji inch 10 temelem lir aser temaba slab ji inch 4 temelem lir, ta metetdaktsü.
Iba sentong ya JVC Chairman, Dr. Nolesol Zhotso leniba nung agi aser Asst. Catechist, Koleto-i sarasadema liasü.