Jalalabad TV station ka ISIL temi amakdang nisung 6 asü

Jalalabad, May 17 (Agencies): Afghanistan anüdoklen aliba Jalalabad yimti nung national television aser radio station kati prangpong bener temang nung bomb alenloker aita amakba mapang police tanishir ka densema nisung 6 asü.
Amaker temi AK-47 bener Radio Television Afghanistan (RTA) indang ki telungi Bodhbarnü ait, ta osang ajanga ashi.
“RTA amaker ya parnok nisung pezü liasü aser nisung kati iba ki telungi aitdak suicide bomb ka bokdaktsü,” ta provincial governor, Gulab Mangal-i ashi.
RTA building ya governor ki anasa lir aser iba ki anasa prangpong kanga sashia akha.
Tanüngba nisung asem ya mitkartemi khaset, ta Mangal-i ashi.
Islamic State of Iraq & Levant (ISIL, ISIS ta ajar) teloki iba lendong ya agütsü, ta sangdongogo aser US drone ajanga Afghanistan nung ISIL tanishir ka tepsetba sülen iba lendong atalok.
Iba lendong nung osangbener ka densema nisung 16 yiru, ta osang ajanga ashi.
“Asürtem rongnung RTA nung mapa inyaker driver ka, tanüker ka, technician ana aser police ana lir,” ta Mangal-isa ashi.
ISIL telok ya Nangarhar province nung tesep tenteta lir aser iba tesem nung Jalalabad ya yimtiba lir aser parnoki Taliban aser Afghan sorkar den rarar.
Taoba ita US mitkartemi GBU-43/B Massive Ordinance Air Blast bomb, koba dang ‘Mother Of All Bombs’ ta ajar, iba bomb ya Nangarhar nung ISIL telok alidak pokloktsü aser iba mapang ISIL nungi nisung ter dak tali asü.
Iba bomb bokloktsüba ajanga alima nung aliba kin aikati, bomb tendangtsü asoshi asoshi Afghanistan ya amshir, ta aitsür.
Bodhbarnü iba lendong ajanga Afghanistan nung aliba osangbenertem taküm lendong nung aliba tali jangja sayur aser tensa mejungi akümba angur.
Afghan Journalists’ Safety Committee (AJSC) ajanga ashiba agi, 2016 küm ya osangbener tem asoshi küm tamajungtiba aser alima nung osangbenertem ashoshi lendong aliba linük nung Syria temaba aser Afghanistan ya tanabuba jenjang nung lir, ta ashi.
Taoba küm osangbener 13 tepset aser item rongnung parnok 10 bo Taliban ajanga tepset, ta AJSC-i ashir.
2016, January nung TV channel, Tolo nung mapa inyaker 7, Taliban indang suicide bomb ajanga Kabul nung bokset aser iba mapa ya osang tai belenshiba asoshi mangyangba mapa ka lir, ta Taliban teloki ashi.
2001 küm Taliban tashi samatsüba sülen Afghan nung osangbener dak amakba lendong rongnung ibai tuluba liasü.
US ajanga mitkar teyari agüjaka, Afghanistan nung yimten yimsüsüba tensa tamajungba akümer, ta US intelligence agencies nung tekolakba, Dan Coats-i taoba hopta metetdaktsü.
US-i aniba mitkartemi Afghanistan nung küm 16 jungnüa rarayonga arudagi, aser iba ya America nunger asoshi rara talangtiba kümogo.