Jallikattu nung nashipongchi-i nisung asem tashi tongsetogo

Madurai, Aenjeti 16 : Madurai anasa aliba Alanganallur yimtsüng nung Sangtennü lanur kati “Jallikattu’ (Bull Taming) nung nashipongchi ka azüoktsü merangba mapang tangokba noksa nung angur.

Madurai, Aenjeti 16 (Agencies): Tamil Nadu Jallikattu benjongmung nung Sivagangai district nung Sangtennü nisung ana nashipongchi agi tongsetba sülen tang tashi nung iba benjongmung nung asür parnok asem kümogo.
Tentonü Madurai nung arishi küm 19 tain ka tongsetba sülen tang iba ya ataloker.
Tanü asüsang ana ya Karaikudi nung arishi küm 45 tain Ramanathan aser Pudukottai nung arishi küm 54 tain Kashi, ta jangjaogo.
Tentonü arishi küm 19 tain Kalimuthu ya nashi pongchi azüokba asaya tatemi ‘collection point’ ta ser tatembangbuba asaya mapang nung tongset.
Kalimuthu ya iba asaya mezüngbuba round nung shilem agia liasü, aser iba round tatemtsü lia ‘collection point’ asaya mapang nung nashi pongchi kati tongset.
“Kalimuthu ya pa indang tata mapang temer arena temalen nashipongchi tem den asayaa aliba mapang nung tongset,” ta Madurai collector Veera Raghava Rao-i ashi.
Ring aser corridors koba ajanga nashipongchitem tugur, iba tesemtem yabo nüburtem kümzüka ayutsü mechi nung kanga junga atsübanga lir. Kalimuthu, shiba nashipongchi tezü agi temang ateta atong, pa mozüki-i anir ao saka pa tasü bener aru ta mozüki nung alirtemi metetdaktsü.
Jallikattu ya Tamil Nadu nung kanga nüngtugu süa asayar, saka yaküm iba anema lokti aikati nokdakba sülenang linük ajungai meteta aküm.
Jallikattu ya asaya ka lir aser iba asaya nung asayartemi nashipongchi azüoktsü meranger. Iba asaya nung shilem agirtem nokdaka aliba tesemi nashipongchi ya yoker aser shilem agirtemi parnok indang terongtong aser tezü nung amtsü meranger. Iba asaya ya ‘Mattu Pongal’ mapang asayar.
Animal rights activists temi iba anema nokdakba sülen Supreme Court ajanga Jallikattu ya 2014 küm nokdangkja liasü. Tamil Nadu nung iba anema longkak aitba sentong aika akaba sülen Tamil Nadu sorkari SC-i obendang agütsüba paidoktsü atema ozüng tasen ka yanglu.