James Gunn-i ‘Guardians of the Galaxy Vol.3’ direct asütsü

Metsüremi/March 16 (Agencies): Film yanglur James Gunn, pa anema Twitter ajanga tashishitsü aketba ken o proka pa tukudaktsüba sülen tang ‘Guardians of the Galaxy Vol. 3’ direct südaktsütsü atema tanaben studio-i aniokogo, ta osang ajanga metetdaktsü.
Iba project den otongdar osang ajanga ashiba agi, Disney-i senden aser olemtep aika agiba sülen iba movie atema Gunn tanaben anioktsü telemtetba agia liasü.
Küm 10 tejakdang tetsür tanurtem anema Gunn-i mapa tamajung inyakbatem jungai adokba ajanga pa mapa nungi tukudakja liasü. Gunn-i aibelenba nung ajemdaker instalment tasembuba direct mesüdaktsütsü atema studio-i Gunn agiena liasü.
Installment tasembuba direct asütsü atema osang prokba sülen, Hokolbarnü Twitter ajanga “tesüiba ita nunger nung kwinakati ni pusema nungitta yariogo, nenok kija shia dang pelar,” ta Gunn-i lemsatep.
“Lenla balala nungi teti dang ni angazüker aser kü dak aliba shisatsü tajungtiba agi kü wadang nung maneni meranga tenzüktsü. Film tasembuba direct asütsü atema Disney-i telemtetba agia kü nem maongka agütsüba atema parnok danga pelar aser asenok tsüngda temeim nung tesendaktep tali akangshia yanglutsü atema ni film tem yanglutsü yongya atar. Nenok temeim aser teyari ajanga ni iba maongka ngutetogo. Kü mulung taroktiba nungi, nenok ajak dang tepela aser temeim lemsateper,” ta Gunn-isa shisem.