Jammu district nung Pak nunger shells ajanga nisung pongu asü

Jammu, Monupii/May 18 (Agencies): Tanü Pakistan nungeri shells yokba ajanga Jammu district kübok International arrtsülen BSF sepai ka densema nisung pongu asü aser nisung ter yiruogo, ta ketdangsertemi metetdaktsü.
Pakistan Rangers-i shells yokba ajanga R.S. Pura, Arnia aser Bishnah sectors nung BSF constable, Sitaram Upadhyay densema nisung pongu asü, ta police-i metetdaktsü. Civilian pezü rongnung arishi küm 45 tetsür ka den tebur asem liasü.
“Ano BSF nung assistant sub-inspector ka densema nisung ter yiru aser tang parnok hospital nung yaridar,” ta police ketdangser kati metetdaktsü.
Iba osang angashia Jammu & Kashmir Chief Minister, Mehbooba Mufti-i, India sorkari state nung ceasefire sangdonger aliba mapang ka nung nisung tepsetba atema sasar, ta metetdakja takoksa angur kibongtem den tejashi lemsatep.
Tanü agi asemnübuba Pakistan-i ceasefire alema inyakogo. Tesüiba anogo ana nung Pakistan Rangers-i Kathua aser Samba district na nunga ceasefire alema inyakogo.
Ato kilonser, Narendra Modi-i Küptoknü nungi tenzüka anogo ananü state semdangtsü lia International arrtsülen Pakistan nungeri shells yoker.