Jammu & Kashmir nung atalokba ya Pak ajanga lir: Rajnath

Delhi, August 10 (Agencies): Kashmir Valley nung mepetmesü aliba onük nung Bodhbarnü Rajya Sabha nung Union Home Minister, Rajnath Singh-i, Jammu & Kashmir nung rara adokba ya Pakistan-i ajungshiba lir, ta aitsü.
“Kashmir nung kechisa ataloker, iba ya Pakistan-i senotsü agi yariba ajanga lir,” ta Union minister-i ashi.
Tang state tensa dak sentakba nung Singh-i, mapang ajak nungbo curfew ozüng mebenoker, ta metetdaktsü.
“Kashmir nung aliba nüburtem sadoksadoka alir ta ni mashir, ajisüaka tensa mejungi aliba mapang state sorkari nüburtem nem nüngdakba ajak agütsütsü atema tajungtiba nung inyakdar,” ta pai ashi.
“Kashmir nung long agi aonba ajanga ambulance 100 raksaogo, ajisüaka ambulance 400 bo maneni amshidar. Rara adokba sülen J&K Chief minister aser teshimtet teloktem den senden 30 ben menogo,” ta paisa ashi.
“Kashmir nung longkak ait tenzükba sülen tang tashi nung security sepai 4,515 aser nübur 3,356 yiruogo. J&K nung LeT telungpur kari asen sepaitem aser parnok kibongtem amokmerentsü meranger,” ta paisa ashi.
Longkak aitertem azüoktsü atema injang tila ‘pellet’ amshiba dak sentakba nung Home minister-i, “Iba raraba oset amshiba medentsütsü meranger masü, ajisüaka iba ya taoba mapangtem nunga amshiogo. Kashmir nung longkak aitertem azüoktsü merangdang sepaitemi kanga tazüokba nung tashi amshitsü tuyuogo,” ta ashi.
Minister-isa, “Bihar, Kolkata aser Uttar Pradesh atema aria bilemtsüba den kasa onoki Kashmir atemaa bilemtsür. J&K nüburtemi iba ya angatettsüla,” ta ashi.
Tawa Pakistan Ato kilonser, Nawaz Sharif-i Kashmir ji Pakistan meyong akumtsü ta jembiba aija Singh-i, “Alima nung kecha tashi agia Jammu and Kashmir ji asenok ket nungi bener moutettsü. Pakistan den ken o jembitsüsa kümra ibaji Kashmir onük nung masü saka PoK (Pakistan occupied Kashmir) onük nung asütsü,” ta pai ashi. Rajnath-isa tatartem dang, Hokolbarnü Ato kilonser Modi-i Kashmir indang jembitsü atema party ajak senden ka ayongzüktsü, ta metetdaktsü.
PM Modi-i Kashmir atema masü saka Africa atema tweet asür: Congress
Ano New Delhi nungisa tanga osang ka nung Bodhbarnü Congress-i, Ato kilonser Modi-i Kashmir onük ji Parliament nung masü saka Madhya Pradesh nung ang jembir, ta aitsüogo.
“Kodaser Ato kilonseri Kashmir indang Madhya Pradesh nungi jembir. Kechiba Parliament nung mejembir,” ta Congress lenir, Ghulam Nabi Azad-i Rajya Sabha nung asüngdang.
“Ato kilonser Modi-i alima nung tatalokba balala atema tweet asür, saka Kashmir tensa atemabo ola madoki liasü. Kodang Africa nung langka atalokdir Ato kilonseri iba atemaji tweet asür. Ajisüaka kodang India nung Taj rongdir, iba tatsük jagi Centre sorkar matonger,” ta Azad-i ashi.
“Onoki angazükba agi, Madhya Pradesh nung pai (Modi) Kashmir indang jembi, kechiyong chief minister-i pa dang aji oda süang ta ashi. Iba ya ajanga Ato kilonser atema  Parliament ji jenjang maket kümdaktsür, aser chief minister-i pa dang mashi asübo pai Madhya Pradesh nung Kashmir indang mejembila,” ta Congress lenirisa ashi.
Yashi Modi-i, India nunger ajaki Kashmir meimer, ta jembiba dak sentakba nung Azad-i,  “Kashmir tepor ajungba kijaji memeimtsüla. Tenük pokdaktsür alirtem, yirua alirtem aser asürtemji meimtsüla,” ta paisa ashi.
Kashmir nung longkak aitba sülen anogo 32buba nung ang Ato kilonseri ola adoka Kashmir indang jembia liasü.