Jammu & Kashmir Police-i Shujaat Bukhari tepsetertem noksa saya

Srinagar (Jammu & Kashmir), Aami/June 15 (Agencies): Tanü Jammu & Kashmir Police-i yashi Srinagar nung journalist, Shujaat Bukhari den pa tanüker ana khasetba noksa ka sayaa nüburtem dang parnok tepsetsang maitsüji jangjaba nung yariteptsü mepishiogo.
Bukhari indang office kima pa amakba sülen iba tesem nung alir kati tangokba video ji police saya. Kasa video nung bangsemo keta alir nisung kati Bukhari indang gari ladangba noksa densema lir.
Jammu & Kashmir Police-i twitter ajanga, “Srinagar nung Press enclave amakba nung ano melung malemer ka maitsü jangjatsü atema Srinagar Police-i nüburtem teyari meshir,” ta metetdaktsü.
Nisung kati Bukhari tannükertem atsüzükba mapang nung melung malemsang jagi pa indang pistol shia arur aser police iba tesem nungji lia iba tesem nungjagi pa samadoker.
Yasüng CCTV noksa nung ajemdaker police-i motorcycle nung mena alir nisung asem noksa sayaogo, ajisüaka parnok tejakji mereprangteter.
Motorbike anisangji merang korang ka sema lir, tesülen amensangji sü agi tejak nembanga lir aser tiyong nung amensangji tejak nembanga mali, saka CCTV noksa agi mayimjemtsü atema tip külenji shia lir.
“Yashi kiralongrartemi Srinagar nung Press enclave amakba dak sendakba nung police-i nüburtem dang police-i bushisüngdangba nung yarisema melung melemteti alirtem maitsü jangjatsü atema teyari meshir,” ta police otongdar kati metetdaktsü.