Jammu lendong nung telungpur 7 aser sepai 3 asü

November 29, 2016 : Jammu tezülen aliba Nagrota nung telungpuri army tesep amakba mapang army temi parnok den kahteptsü renemshiba noksa nung angur. Nagrota ya Army, 16 corps indang headquarter lir.

Jammu, November 29 (Agencies) : Tanü Mongulbarnü Pakistan aartsü nungi kilometre 20 shi pilar Jammu anasa aliba Nagrota jila nung taküm bendanga agütsür, tapoktsü tesashi pokloktsür, kiralongrartemi prangpong aser grenade jenti bener military artillery amena aliba tesem ia maka kahtepdang Officer ana dena sepai tenet kahset aser tamakertem rongnungia parnok pezü tashi asü. Ano Pakistan nunger den International Border tsütsülen kahtepdang telungpur asem kahset.
Item kiralongrartemi mezüngbuba officer kibong tem aliba quartertem amak, ta army sangdong ka ajanga metetdaktsü.
Tanü telungpuri amakba army base aser BSF teseptem ya Jammu tezülen lir aser iba amala lendong ya September 29, 2016 nü India-i surgical strike aoba sülen tanü mezüng ataloker.
Lendong agütsür telungpur telok ya police sobutsü sobur aru aser Pakistan arrtsülen anüktsü lemzüktsüba Indian Army, 16 Corps anasa aliba Nagrota military tesep nungpoka ait, ta police-i IANS dang ashi.
Anepdang 5:30 ako meta telungpurtem jagi automatic prangpong aser tapoktsütem bener sepai tesep nungpoka ait. Parnoki mezüng Nagrota nung aliba Officers’ Mess nung injang kanga sashia akah. Nagrota ya Jammu nungi kilometre 15 shi pilar lir, ta police ketdangser kati ashi.
“Sepai asem aser telungpur pezü asü aser nisung asem yiru,” ta police ketdangser jagisa ashi.
Sepai tasürtem rongnungji 166 Medium Regiment Artillery nungi Major Kunal Gossain-a densema lir. Telungpur tasütem tasümang ajak ngua lir aser iba tesem nung manen mita odar, ta pai ashi.
Ajisüaka military otongdar Lt. Col Manish Mehta-i mita aoba osang tejangja memetetdaktsü. Pai, secutiry temi iba tesem tawa meyutsüi mita odar, ta IANS dang ashi.
Nagrota nung kahtep tiyalong nung ano Jammu nungi kilometre 40 shi pilar aliba Samba nunga kahtep meso.
Pakistan nunger kar arrtsü ajanga aitsü merangba ngua security force temi injang akah tenzük, ta police ketdangser kati ashi.
Iba rara nung kiralongrar asem kahset, ta ketdangser kati ahsi.
Asür kiralongrartem tasümang ka bener aotsü merangdang IED ka apokba ajanga arrtsü anüker police trok tashi kanga mekungi yiru. Teyirur rongnungji Deputy Inspector General, B.S. Kasana-a densema liasü.
IED apokdang injang ayuba tesem nung mi adokba ajanga parnok trokji yiru, ta police-i metetdaktsü.