Jan 20 nü Karbi Anglong mokdangtsü

Dimapur, January 16 (TYO) : January 20, 2016 nü Karbi Anglong ghonda 12 mokdangtsü ta All Adivasi Students’ Association of Assam (AASAA)-i sangdong ka nung metetdaktsü.
Naga nunger tiyongtsü nung mapa inyaker ka ajanga Lahorijan T.E.(Garden) defence ket nung agütsüogo aser ibaji anema onoki lungkak aitba sentong ayongzüker, ta AASAA mendenpurtemi sangdong nung shia lir.
Taoba mapang iba Tea Estate kibur Robin Brahma tepsetba mapa nunga Naga nunger tiyongtsü nung inyaksang dak tai tonglokja lir. Ano, Karbi Anglong nungi yimsüsür kari sen atema Tea Estate ji defence nem agütsütsü atema temelaba agütsü aser AASAA-i item mapa anema noktaker, ta sangdong nungsa shia lir.
Sadiya nungi Dhuburi tashi Naga nungeri ali atsünga agiba inyakyim anema Assam-i noktaker saka Karbi Anglong nungi shimtetba yimsüsürtem aser Naga nunger nisung ka tsüngda miim tasa atonga ali atsünga agir aser ibaji onoki magizüker. Item inyakyim ajanga KAAC-i Adivasi nungertem Karbi Anglong nungi agientsü mapa atema inyakba ajiteter. Anungji AASAA-i January 20, 2016 anepdang 5:00 ako nungi nikongtsütsü 5:00 ako tashi Karbi Anglong mokdangtsü sentong ayongzüker, ta AASAA mendenpurtemisa sangdong nung metetdaktsü.