Jan. 9 nü Mkg town ghonda 7 mokdangtsü

Mokokchung, Jan. 8 (TYO): State sorkari municipal aser town council election-i inürtem atema nomination file asüba anogo atsülangtsüba asoshi tejashi sayua January 9, 2017, Hombarnü anepdang 8:00 ako nungi nikongdang 3:00 ako tashi Mokokchung town ajak mokdangtsü, ta Deobarnü Ao Senden sangdong ka ajanga metetdaktsüogo.
Iba mokdangba ya state sorkari nübur khenyongi akhüm metsübui iba nomination file asüba anogo atsülangba anema mepelaba sayua ayonger, ta Ao Senden ketdangsertemisa metetdaktsü.
Iba mokdangba mapangji police, paramilitary, medical, magistrate on duty, osangzülurtem aser emergency service kar dak alaka gari aser public shinga mesenzüdaktsüi nokdangtsü, ta sangdong nungsa metetdaktsüogo.
Sorkari January 9 tashi nomination file asüba mapang atsülangba yabo nübur mezüngmeshiba aser khenyongi akhüm metsübuba jakdaka sayur, ta Ao Senden ketdangsertemi osangbenertem senden ka nung jembidang ashi.
Tongtibangsa Khristan pur asoshi temeshi anogo ka kongshia nomination file asüba anogo atsülanga nübur mulung yirutsüba asoshi Ao Sendenisa state sorkar aitsüogo. Amungnü raksaja joko state sorkari Khristan yimsü anema iba tashi inyaker, ta parnokisa ashi.
Nomination atema anogo atsülangba ya Municipal Act nung shia mali, anungji iba ama shisatsü tamajung yur lendong bener arutsü sentong atongba asoshi Ao Sendenisa state sorkar aitsüogo.
Nisung kar ajangzüktsü mechi sorkari anogo atsülangtsü sentong yangluba yabo khenyongi tim masü aser ashikülak sentong tamajung ka lir, ta parnokisa kukua aitsü.
Iba mokdang maparen nung nüburtemi amalitepa nungittsü mepishir aser iba ama koda masü tia juruba asoshi sasaa bilemer, ta Ao Senden ketdangsertemisa metetdaktsü.