Jan Dhan account nung sen aika rizüngba atema sorkari tenük yoker

New Delhi, November 12 (Agencies): Sen 500 aser 1000 note agienba sülen zero-balance Jan Dhan account tem nung sen onsara bendenba atema Centre sorkari tenük yoker.
Anogo ana tsüngda banking system nung kanga dang ajungbena sen crore lakh 2 shi aitba atema sorkari tenük yoktsü tenzük. Finance minister Arun Jaitley-i ashiba agi, ozüng amertemi tim mesüi sen melentepertem dak tenük yokdar.
“Kanga dang ajungbena Jan Dhan account tem nung sen rizünger ta onok nem osang kar sangoktsü. Iba nung tim mesüi inyakba lir ta ajiteter aser iba jagi onoki bushisüngdang tenzükogo. Pei dak malangba sen bendena aliba putet nungbo bangdak department temi mapa inyaktsü” ta paisa ashi.
Sorkari sen tejentem taseni melenba mapa tiptema aser nübor nem timtem magütsüi tekaratiba nung tembangtsü atema meranga inyaker aser iba maparen nung Enforcement Directorate aser revenue department-i tenük yoka reprangshimdar, ta Arun Jaitley-isa metetdaktsü.
Sorkari agienba sen 500 aser 1000 note tem hon aliba nung mesüra premium ka atema melenteper ta osang kar jembiba mapang Finance Minister-i iba olen ashi.
ED-i foreign exchange dealers 67 aser Directorate General of Central Excise Intelligence-i tongtipang jeweller aser bullion traders dak tenük yoka maparen reprangdar.
Tesüiba anogo ana ser tesadang tsüngda India nung bank tulutiba- State Bank of India (SBI) nung sen crore 47,868 tashi enokogo. India nung banking system maparen inyakba nung SBI noklang nung shilem 25 shi agir, aser iba nung ajemdaker bank ajak nung iba mapang tsüngda sen lakh crore 2 shi enoker asütsü ama asadangteter.
November 8, 2016 aonung Prime Minister Narendra Modi-i kanga dang ajungbena, tamshidak sen 500 aser 1000 note tem agiener ta osang metetdakja liasü.