Jan ita tatemlen J&K sorkar akümtsü; BJP-i tetsür ka lenir aginer

Jammu, January 19 (Agencies): January ita tatemlen nungbosa Jammu & Kashmir sorkar akümtsü lia BJP-i par party den teloktep party, PDP den amalitepa inyaktsü atema state nung BJP party affairs in charge atema tetsür lenir ka shimtsüa akok, ta BJP osang ka ajanga ashi.
“Tan yimtenren yipru süigo, tan ita tatem tashi nungbo Peoples Democratic Party-Bharatiya Janata Party sorkar tentettsüla,” ta BJP osang ka ajanga IANS dang ashi.
Kasa osang ajangasa, PDP lenir Mehbooba Mufti chief minister akümba sülenbo BJP general secretary Ram Madhav-i state nung shilem tilaba agitsü, ta ashi.
Yaküm March 1 nü Mufti Mohammad Sayeed-i aniba sorkar akümba sülen Jammu & Kashmir nung Madhav leniba nung BJP maparen inyaka arur.
“PDP den amalitepa inyaktsü atema Party pangdakpurtemi tetsür lenir ka bushidar, kechiyong Assam aser tanga state tem election atema Ram Madhavji kanga mazüngi akumtsü,” ta osang ajanga ashi.
“State BJP incharge tasenbaji Central sorkar aser party nungi tetsür tongti ka asütsü,” ta kasa osang ajanga ashi.
Muslim timba aliba state J&K nung tang mezüng tetsür minister Mehbooba Mufti-i BJP teyari kanga nüngdaktsü ama reprangteter.
“Lai tebui toktsüba maparen bener aotsüsa akumer, saka lai tebu ama yimtenren nung kangabo ajangshia mali. Lai yimsüsübaren nung la dak sempet aliba kuli tekaraba nung sayutsü nüngdaker. Iba atemaji lai BJP pangdakpur teyari nüngdaktsü,” ta PDP osang ka ajanga ashi.

You must be logged in to post a comment Login