Jan-Michael Vincent arishi küm 73buba nung süogo

Metsüremi/March 09 (Agencies): America nunger actor tejen Jan-Michael Vincent alima nungi pilaogo; pa arishi küm 73 liasü.
Osangtem ajanga angazükba agi, Vincent indang ‘death certificate’ nung pa cardiac arrest (temulungjang agi junga mapa meinyakba) agi timtemba sülen February 10, 2019 Deobarnü süa liasü.
1967 küm Vincent-i film industry nung ajemoka liasü. Iba küm pa indang mezüng film – ‘The Bandits’ sayaa. Iba sülen, pa dak sempet tajung aliba ajitetta film yanglurtemi pa nem film balala nung shilem agitsü atema maongka agütsü. Item film rongnung Vincent-i ‘Buster and Billie’, ‘The Tribe’, ‘Big Wednesday’, ‘Hooper’ aser ‘Damnation Alley’ nunger nung takok ngua tongti shilem agiogo.
Film industry tsütsü Vincent takok ngua aser nüngtugo akümba dak alia, taküm nung pai timtem jenti ajurua liasü.
2000 küm Vincent-i taoba mapang tetong mashisa aliba mapang la dak teka sangshiba ajanga tanur tebok nung raksar magishi; iba dak sendakba nung pa anema benokba ken o angadangtsü atema pa okadaki maoba asoshi pai senchi US sen $350,000 agutsütsüsa akum. Kasa kümji Vincent-i ano ozüng alema aibelenba den yimdong nung yi agi meseper timtem agütsüba ajanga anogo 60 tashi pa tepuokdak ayu.