Jana Gana Mana masü Vande Mataram ya linük naklu ken lir: RSS

Mumbai, April 02 (Agencies): RSS tongti, Mohan Bhagwat-i ‘Bharat Mata Ki Jai’ ta ajaki ashitsüla ta jembiba ajanga ashishitep adokba sülen tang RSS nung tongti lenir kati, ‘Jana Gana Mana’ masü saka ‘Vande Mataram’ ya shitakba linük naklu ken lir, ta ashi.
Hokolbarnü Mumbai nung aliba Deendayal Upadhyay Research Institute nung jembidang RSS General Secretary, Bhaiyyaji Joshi-i, “Tanü asen linük naklu kenji Jana Gana Mana lir. Ibaji akhümtsübutsüla. Iba ya ajanga tamangba lokti kar mulung yirutsütsüsa kuli mali, saka Linük Temzüngi shimtetba ama iba ya linük naklu ken lir. Nisung kati tetezü junga shisadangra Vande Mataram ya linük naklu ken lir,” ta ashi.
“Temzüngji linük asübayong asenoki latetbatem agizüker,” ta paisa ashi.
“Jana Gana Mana ya kodang zülu (?) Iba ya zülur mapang talangka, saka Jana Gana Mana ajanga ashibatemji linük temulung nung yur zülu. Ajisüaka Vande Mataram ajanga ashibatemji ajanga linük mulungsentsü aser sobaliba sayur. Ken ana tetsüngdaji iba ya lir. Anaprongla akhümtsübutsü langer,” ta Joshi-isa ashi.
‘Vande Mataram’, tetezü “Oja, ni na asanger” lir aser iba sangro ya Bankim Chandra Chattopadhyay-i zülu. Iba ya ‘Tetsü Tasoli’ indang ken lir aser iba ken ajanga India nunger nüjiso bushidang tongtibang shilem ka agi. 1950 küm iba ken nung mezüngbuba tekong ana nem ‘linük ken’ jenjang agüja liasü.