Jana-reja indoktsü atema Wokha nung gari semzük

March 30, 2017 nü Wokha nung DC Wokha, Wezope Kenye aser ward balala nungi züngsemtem tangokba noksa nung angur.

Dimapur, March 30 (TYO): India Ato Kilonser, Narendra Modi lenisüba nung ‘Swachh Bharat Abhayan’ (Clean India Movement) sentong kübok Wokha nung Deputy Commissioner, Wezope Kenye ajanga March 30 nung jana-reja indoktsü asoshi gari semzüktsüba sentong ka DC Conference Hall nung agiogo.
Wokha jila nung Ward 15 lir, aser item ward tem nungi jana bendena indoktsü asoshi Wokha DC-i gari 8 agütsü, ta ketdangser osang ajanga ashi.
Item garitem ya Department of Urban Development ajanga Town Council nem jilatem aser temeket merükteta ayutsü asoshi agütsü. Anungji nüburtem aser item gari amshirtemi pei indang oset ama anepalua aser meima amshitsü asoshi DC-i nüburtem dang ayongzük, ta ketdangser osang ajanga ashi.
Item gari ya junga anepalutsü asoshi colony shia Management Committee shimer sentong balala yanglua amshitsü asoshi DC ajanga shisem, ta kasa osang ajanga ashi.
District nung jana bendentsü asoshi cesspool gari tekeraba nung bener arutsü aser iba ajanga nüburtem jana indokba tesem merüktettsü asoshi shisabulu malitsü asoshi DC-isa shisem.
Item gari ya lendong balala nungi kümzüka amshitsü asoshi Tsüngrem dang teyari meshia Wokha Town Baptist Church nung Pastor, Rev. Sulumo Ezung-i sarasadem aser iba sentong ya Wokha ADC, Hotolu Swu-i ketdangsüa ani, ta kasa osang ajangasa ashi.