Jangjatsü asoshi temürük – Luke 3:1-17

“Anungji nenoki chiyongaka, jemaka, kechisarerna inyakaka, ajakji Tsüngrem sentsüwangshi asoshi inyakang.” (1 Kor. 10:31).
Kodang asenok tatitangba koker temeshi alitsü merangba nung takok mengulir, asenoki tetsüngda nung anenadoker. Kechiyong tamakok ajak nung asenok kuli bener arur. Asenoki maneni ano kuli ana shisadangdi :-
1. Temeshiba tajaba lir
Mapa kar nungbo asenoki temeshi alitsü tamakoktsü ta asenoksasa miima telemtetba agir alir. Saka Laishiba kor taküm aser chipo, auso nung “temeshi” ta zülutsü shia lir (Zeka. 14:20,21). Iba tetezü Tsüngremi Pa nübur yimsü nung dang masü saka yimten mapa, kidang mapa ajak nung temeshi alitsü yimlar. Asenoki asen takümji temeshi aser alima taküm ta melemdangli.
Yohan Baptitsübai iba telangzüba agüjadoker- police, alimelen sarur aser yimkong asoshi (Lk. 3:10-14). Kari mapaji temeshi alitsüba mapa masü ta bilemra mapajiang melenadokang. Kechiba nai tai inyakba ajak Satan dak atongtsü ? Na tajangzük angutsü lenmang aika liaka na iba mapa nung ali tashi temeshi melitettsü ta bilemra Yosef ama ne mapaji melenang/ tokjang.
2. Temeshibaji Mapang dak aket (Situational)
Temeshi alitsübaji taliba tesem, temeket yimya tia dak aket ta bilemertem asoshi tangazüktsübaji Khrista shi akümbaji lir. Yisu Khrista iba temenen lima nung temenen memenai temeshi taküm ali (Yn. 1:14; Ibri 7:26). Pa asenok ama ajak nung atitang, aji saka tai memenai. Pai asenok asoshi aria bilemtsür, aser nüngdak ajak nung Pai asenok nem teyari agütsür (Ibri 4:15,16). Yeriko itangiter aonung nüktapangta tsüri sotaka parnoki merüktetta ali. Danieli jabujari chiyongtsü nungi kümzüka ali. Alima nung kecha temenen maliba maka. (Lipok 6:11, 12). Alima ajak tamajungba kübok lir (1 Yn. 5:19). Asenoki alima nungi jena aotsü makok (1 Kor. 5: 10b). Yisui asenok asoshi mapa agi sayua Tebu dang sarasadem: “Ni alima nungi bener oang ta sarasadem masü, saka Nai parnok tamajungba nungi kümzükang ta sarasademer” (Yn. 17:15). Tsüngremi tatitangba sang nungi jenbutsü lemang lapoktsür (1 Kor. 10:13).
Kü Kümtetdakba Pai jajaba lemang nung ni kümzüka anitsü (W.O. Cushing, 1823-1902).