Jangpetkong arem nung tenem ozütem arua lir

Dimapur, January 5 (TYO) : Khristmas aser Küm Tasen tsüngda Jangpetkong tzükong nung aliba arem nung tenem ozü trok arua lir ta Mangkolemba Sub-division nung alir aser Khar yimertem ashir.
1960s tashi ka nung Jangpetkong nung aliba arem nung tenem ozütem liasü saka nisungtemi ozü akahba aser süngdong-lidong lendokba ajanga ozütemi arem toktsür ao, ta tzükong nung tantsü-tambutemi ashi.
Küm 55 shi lir külen tenem ozütem tanaben Jangpetkong nung aliba arem bushia aruogo. Kilometre 20 shi arem nung anüngdang tenem ozütemji tesem balala nung angur saka nikongtsütsü tashi nung ozütemji Mangkolemba aser Khar tsüngda aliba min ka nung anenzükba angur.
Iba dak sendakba nung ADC, Mangkolemba-i Wild Life Protection Act 1972 kübok tenem ozü mekahsettsü atema tetuyuba agütsüogo. Ano külen Khar Village Council-ia tenem ozü mekahsettsü atema tetuyuba ka agütsüogo.
January 4, 2016 nü DPRO office, Mokokchung nungi noksa tangokertemi tenem ozütem anguba tesemtem sema senzü saka ozütemji mongutet. Jangpetkong tzükong nung tenem ozütemji kobika mungzüktsüar meshiteter kechiyong tang iba arem nung süngjang atangba süngdong aika mali kümogo.