Dimapur, August 11 (TYO): Jangpetkong kübok government school 26 semdanga aoba mapang school teimbaka nung tesayur agi meperi liasü aser kar nungbo tangar melena inyaker (proxy) tesayurtema liasü, ta Jangpetkong Kaketshir Mungdang lenirtemi metetdaktsü.
Taoba July ita 19 nungi tan August ita 3, 2016 tashi nung JKM lenirtem Jangpetkong kübok aliba town aser yimtsüngtem semdanga aoba mapang parnoki government school-tem semdanga yangji aliba tesayurtem, VEC aser putu yimsüsürtem den shisalemsatepa liasü.
JKM lenirtemi government school-tem semdanga aoba nükjidongji Jangpetkong kübok government schook kecha nunga ‘proxy’ tesayur mayutsü aser school ajak nung tesayur shitak lia kaketshirtem nem kaketshisatsü shitak agütsüdaktsütsü asoshi liasü.
Ano, Jangpetkong nung government school-tem nung timtem kaji Maths, Scence, Hindi aser MIL sayur tesayurtem maliba ajanga kaketshirtem kanga akoksadagi ta JKM lenirtemisa ashi. Iba denji ano mapang mapang shia VEC, putu menden aser SDEO temelaba magi tesayurtem tangaleni oa adoker aser parnok melen temelen meyoker, anungji school nung tesayur agi meperi timatemba nguogo, ta JKM lenirtemisa ashi.
Item tesayurtemji tanaben peii toktsür aoba school-i meyipa arutsüla, aji mesüra tatem tashi bushitsü ta JKM lenirtemisa metetdaktsü.
Parnokisa ashiba agi, tan parnoki government school semdanga aoba mapang proxy tesayur terka aliba putet aser item ajakji VEC den angatetteper inyakba mapatem liasü ta JKM lenirtemi mepelaba ken o ka metetdaktsü. Item proxy tesayur terka aliba kaketrejutemji Khar, Waromung, Dibuia, Mongchen, Yimchenkimong, Molungyimsen, Molungkimong, Luyong aser Alongkima nung liasü ta kaketshir lenirtemisa metetdaktsü.
Iba ama proxy tesayur ayuba mapaji VEC-temi anendaktsütsüla aser mapai marurtem mapa nung anentsütsüla, iba jagi dang Jangpetkong nung kaketshirtem ajangzüktsü ta JKM lenirtemisa takangba ka agütsüogo.
Ano, school aika nung proxy tesayur aliba tebilemtsütemji dang masü saka GHS Dibuia, GHS Molungyimsen aser GHS Molungkimong nung Assistant Headmaster mali asü aser GHSS Mangkolemba nungbo Principal aser Vice principal na prongla mapai junga maruba kuli nguogo ta JKM lenirtemisa metetdaktsü.
Item tim masüba aser tamakok mapatem ajakji yakta metongshir tenzükertem ajaki mapa shitak inyaktsü imlar. Ibaji atema ano tang nungi balaka kaketshirtemi mita reprangtsü ta parnokisa metetdaktsü.
Iba sentong takok ngua senzütettsüsa yariteper VEC, putu menden aser kaketsghirtem ajak dang kanga pelar ta JKM lenirtemisa metetdaktsü.
You must be logged in to post a comment Login