Jangpetkong tsükong lenmang yanglutsü tenzüker

Jangpetkong Tsükong lenmang yanglu tenzüktsü asoshi telongjem shisa lemsa sentong ka akadang Hon’ble MLA & Advisor Wb.Temjenmenba den sentong nung shilem agirtem ajak külemi tangokba noksa.

Mokokchung, Mongputeni/October 30 (TYO): Jangpetkong nüburtemi mapang talangka nungi kanga dang yongyaseta aliba Jangpetkong tsükong lenmang yanglutsü mapatong tenzüka aotsü asoshi Jangpetkong  nung aliba Mungdangtem,yimden yimsüsür aser lokti balala nungi lenirtem adenshia tanü Orija Salang Changki nung telongjem sentong ka kaogo.

Jangpetkong tsükong lenmang yanglutsü asoshi mapatong tenzüka aoba mezüngbubaren  “Jangpetkong Road Construction (Phase-1)” ta sür Jangpetkong nung tongtipangtiba tsükong lenmang ya Changki X-Junction nungi Luyong tashi  kilometer 62 lir aser tangji mezüng süa Changki X-Junction nungi Dibuia tashi Kilometer 20 Phase-1 nungji inyaktsü aser iba ya mapang tatakzük küm ana nung renemtsüla aser ano tanüngbaji Phase-1 temer kelen ano maneni inyaka aotsü sentongtem lir.

Tanü iba sentong nung Hon’ble MLA & Advisor Transport & Technical Education Wb. Temjenmenba-i jembidang Jangpetkong nung lenmang yanglutsübaji Jangpetkong nüburtemi pongmanga aliba asangsang nung ataloker aser ibaji Jangpetkong nübur asoshi tesüngmangtsüka lir, Jangpetkong tsükong lenmang songtema yanglutettsübaji shisadangra Nagaland statehood ngur mezüngbuba lir ta ashi.

Jangpetkong lenmang küm 40, 50 tejaklen yanglur alitsüba,saka tangang yanglutetba yagi asenok küm 40, 50 tangar sülen lia aruogo, aji oda lenmang alinung dang terenlok arur, asenok küm 40, 50 terenlok makai aruogo, anungji asenok Jangpetkong nüburtem telen ajak nung tejakleni aotsü mangdang yudi ta Temjenmenba-isa ashi.

Küm aika sülen iba lenmang yanglutsü arur süra asenoki nungtaka aliba ataloker asünung iba lenamng yangluba mapang nung mapa tom nung manentsüsa nüburtemi iba ya nübur asoshi temoatsü lenmang lapoker ta angateta teinyakertem nem timtem magütsüi tekaraba nung iba mapa ya renemdaktsür ano Phase-2-ji kara kara-a tenz kdaktsütsüsa nungittsüla ta Advisor Temjenmenba-isa adenshia aliba Jangpetkong lenirtem ayongzüka jembi.

Advisor Temjenmenba-isa Jangpetkong-ji Ao lima nung Pioneer tsükong asü, saka tanübo iba meraketto samaogo,saka ano iba jenjangto tanaben  shia arudaktsüdi arung, Jangpetkong nunger asoshi teinyaktsü jenti dang lir, anungji Jangpetkong nüburtem longjemer mapatong ajak nung teka amteper inyakdi ta ayongzüka jembi.

Sentong nungsa iba lenmang yanglutsü asoshi Contractor Wb.Niholu Ayemi-i jembidang iba mapa inyaka aoba mapang nung teinyakertemi tajungtiba nung aser tekaratiba nung mapa inyaka aotsü merangtsü anungji iba mapang nung Jangpetkong nung aliba nüburtemi kanga dang tangatetba tajung yaritepdaktsünerta, iba mapa ya tembangtsü asoshi India sorkari küm 2 züngzükja lir saka küm 1 sür tesadang nung renemtsü merangtsü, anungji nüburtemi kanga dang nungita yariteptsüla, asenok ajak yaritepa inyaker kelen ano Phase-1 ji tekaraba nung jung junga tembanger  ano Phase-2 ji inyaka aotsü merangtsü ta lemsatepa ashi.

Jangpetkong Senso Mungdang Tir Wb.C.Imo Walling-i  mapang tatsüka agia jembidang Jangpetkong nübur nungtakba mapa aika lir saka item rongnung Jangpetkong tsükong lenmang ya tongtipangtiba lir  nübur nungtakba reprangteta iba lenmang ya  yanglutettsüsa Advisor Temjenmenbai bener arutetba asoshi Jangpetkong tsükongsanger ajaktenüng nung tepelaba metetdakja ashi.

Jangpetkong Senso Mungdang Tir iba lenmang ya Jangpetkong nunger ajak asoshi lir, anungji iba lenmang yangluba mapang ali kibur aser yim shingaia tax magitsüla ta tsükong mungdang tenung nung ayongzüka jembi.

Changki Yimlang Baptist Arogo Pastor Wb.Noksangmeren Longkumer-i Tsüngrem lenisüba jazüka sarasademer sentong tenzükba den Jangpetkong tsükong nung aliba yim ajak nung Council Chairman-temi jembiba den Executive Engineer,PWD(R&B) Mangkolemba Division Er.Chubatoshi ajanga  mapa koda inyaka aotsü iba indang teratet tejangja metetdaktsü,29 jangpetkong A/C NPF Tir Wb.Aodangnok,JKTM Tir Imomanen Tzüdir aser Village Council Changki Chairman Wb.Tsüpongtsüngba Changkiri parnokia shilem agia jembiba den ano Watsü Telen Changki ajanga ken tajung ka aten  aser Changki Baptist arogo Pastor Wb.Allen Amri ajanga tenüngsang agüja sarasadema sentong tembang aser Wt.Shilulemla Longchari ketdangsüba nung sentong agia liasü.