January 07 nikongdang ‘The Joy Of Giving’ charity concert akatsü

Dimapur, January 05 (TYO) : Dimapur Supermarket tesem nung aliba sensaker kaketshirtem nem kaketshisatsü agütsüba nung yariteptsü asoshi January 07, 2017 nikongdang (Honibar) ‘The Joy Of Giving’ charity concert ayonga akatsü aser iba sentong nung Naga nunger kentener aikati shilem agitsü renema lir.
‘The Joy Of Giving’ ya kanga tang nükla tajung aketba project ka lir aser iba sentong ya tekübok tia nung aliba tanurtem nem kaketshisatsü agütsütsü jangrartem — lanur kentenertem, entrepreneurs, social workers aser shisakartemi anir akar.
Iba kenten sentong ya Hope Centre for Excellence den sendaktepa lir.
Honibar nikongdang 06:00 ako nungi Aiko Greens, H.K.Khulu Road, Purana Bazaar, Dimapur nung akatsü aliba “The Joy Of Giving 2017” kenten sentong nung kentenertem Nise Meruno, Aren and Lydia Longchari, Renbeni Odyuo, Kekhrie Ringa, Thunglamo Ngullie, Asin Shurhozelie, Koramensang Aier, Sophia Mozhui, Yanzo Kikon aser Lanutemsu Lemtor nungeria shilem agitsü renema lir.
Nagaland nung mezüng ballet tsüngsangertemia iba sentong nung shilem agitsü.
Iba sentong ya tan agi asemben buba agitsüba lir. Iba kenten sentong mezüngbubaji 2014 küm The Garden, Supermarket tesem Dimapur nung kanga takok ngua agia liasü aser iba sentong nung aruba sen agi sensaker kaketshir 15 tashi nem teyari agütsüogo.
‘Joy Of Giving’ kenten sentong 2buba nung aruba sen agi sensaker kaketshir parnok nisung 24 tashi nem teyari agütsü.
‘The Joy of Giving’ sentong ajanga temulungertemi sensaker kaketshirtem bendanga agüja yaritsü mesüra pei mulungba tenla agütsütsü maongka angur. Iba den külemi ano tanurtem hopta shia ajurutepba telungjem nung dentettsü mesüra pei medemer kar dang iba sentong nung yariteptsü asoshi osang agütsüba nung yariteptettsü.
Ajaki ‘The Joy Of Giving’ sentong nung arua adenba ajanga tenlaba agi tepela agüba metettsü ayongzüker. Iba sentong indang ticket ka nung sen 500 agi ayoktsü.