January 1, 2016 nungi ‘Call drop’ shia sen ka ka agütsütsü

New Delhi, October 16 (Agencies): Phone nung tejembidak nung line aoba (call drop) shia January 1, 2016 nü nungi mobile phone operator temi phone amshirtem nem temonok sen ka ka agütsütsü asoshi India nung Telecom ketdangsertemi

lemtettsüogo aser ibaji ajanga mobile phone operator tem kanga mepelar.

Telecom Regulatory Authority of India (TRAI)-i ashiba agi, iba ama tejembidak nung line aodang shibai call asüar pa/la nem sen ka ji phone balance nung enoksemtsütsü, ajisüaka ghonda 24 nung call aika line oaka call asem atema dang sen ka ka ji enoktsütsü aser iba dak sentakba nung mobile operator temi ghonda pezü tsüngda nungsa phone amshirtem dangi SMS yoktsüla.

TRAI-i o tejembidak nung line aobaji kechi, ibaji rasaa shiogo.

“O tejembidak nung line aobaji call kanga junga oa tejembidak nung o metemjungi mejembiteti anenba dang ajar aser ibaji service provider meyong network dak keta lir,” ta TRAI-i ashi.

Telecom ketdangsertemi ashiba agi, tower peria azüngtsü asoshi tetsükdaktsü aluba ajanga parnoki azüoktsü mokoki o tejembidak nung line aoba ya ataloker ta telecom operator temi ashiba nung kanga junga asadanga tendangogo.

Anungji item ajakji kanga junga shisadanger külen telecom operator tem aser phone amshirtem ajak makoksatsü meji iba telatetba ya renem, ta parnoki ashi.

Aji oda süaka Cellular Operators Association of India (COIA)-i, Telecom ketdangsertemi kechiba o tejembidak nung phone line aor aser koda ser aor ibaji rateta mashi, ta metetdaktsüogo.

“Inyakyim nung shia alibaji, district headquarter nung shilem 90 aser tezülen shilem 30 tashi network agutsütsü shia aliba dak alaka ki telung atemabo kecha shia mali,” ta COAI nung tekolakba Rajan Mathews-i ashi.

“Anungji onoki tan latettsüba nung mangatetba kar lemsateptsü asoshi TRAI den Decemder 31 tashi nungbo sensak asemtsü kanga nüngdak. Ajisüaka sensak sem mapang tanginüba kati marutet nungbo, court ajanga dang jembitsüsa akümtsü akok,” ta pai shisem.

Pai, “Iba ama telemtetba agiba ya tai. Telecom operator tem nem tower azüngtsü asoshi parnoki teyari agütsütsüla. Nüngdakba ama tower shitak azüngtet nungbo ni anogo 90 tsüngda o tejembidak nung line aoba ya junga kümdaktsüla,” ta ashidang, Delhi kija nunga tower 350 tashi yimti nung ketdangsertemi temulung magütsüi toktsüba dena ajangshia lir, ta shisem.