January 1, 2016 nungi Delhi nung bus tali 6,000 senzütsü

New Delhi, December 10 (Agencies): Brohostibar nü Delhi nung Delhi Transport Minister Gopal Rai aser Power Minister Satyendra Jain nati ayonga Delhi nung mopung menenba atema osangbenertem senden ka kaogo.

Osangbenertem den jembidang Transport Minister Gopal Rai-i, sorkari gari lenmang tem nung nija garitem ajema senzütsü melaba mapang yimti nung January 1 nungi 15 nü tashi Delhi nung public transport bus tali 6,000 senzütsü, ta metetdaktsü.

January 1 nü nungi tenzüka Delhi nung nija garitem odd registration number aliba garitem hopta nung anogo asemnü aser even registration number aliba garitem hopta nung anogo asemnü ta lemdanger senzütsü melatsü.

Rai-isa, “CNG school bus tem nung menden shilem 50 tetsürtem asoshi wazüka toktsütsü. Public garitem nung senzürtem yaritsü atema ‘Puchho App’ ta ser application ka tenzüktsütsü aser nüburtemi ibaji tan ita (December) 25 nü nungi download sütettsü,” ta ashi.

Rai-sa, contract bus 4000 shi senzütsü aser CNG bus 2000 public transport ama senzütsü, anungji tang bus 6,000 lir aser ano bus tali 6,000 senzütsü, ta ashi.

“Onoki asüng Poochho app tenzüktsü, nüburtemi iba App ajanga auto rickshaw mekazüka yutettsü,” ta minister-isa ashi.

“Circular Suburban Rail timba akumtsü atema onoki railway den jembidar,” ta paisa ashi.

Ano Delhi Power Minister, Satyendra Jain-ia, construction tesemtem nung mopung menentsüba mita reprangtsü, Delhi nung bus lanes ajak temaitsü agütsütsü aser January 1 nü tashi nung lenmang nung aliba ongken ajak yanglumatsü, ta ashi.

Paisa, jana rongtokertem tem temerenshi agütsütsü, ta metetdaktsü.

Linük yimtiba Delhi nung mopung menenba nokdangtsü atema gari temzüng tasen yangluba dak sentakba nung Dec 07, 2015 nü Delhi sorkari, Hombar, Bodhbar aser Hokolbar anogotem nung odd number (1,3,5,7,9) garitem senzütsü melatsü aser Mongolbar, Brihostibar aser Honibar anogotem nung even number (0,2,4,6,8) garitem senzütsü melatsü aser Deobar nübo gari ajak melatsü, ta metetdakja liasü.

Dec 4, 2015 nü Delhi sorkari benokba gari temzüng tasenba ya 2016 January mezüngnü nungi benshitsü sentong lir.