January 17, 2016 nü polio mozü jemdaktsütsü

Dimapur, January 15 (TYO) : India kübok tanga state tem den külemi Nagaland nunga January 17, 2016 nü Intensive Pulse Polio Immunization mezüngbuba shilem agitsü, ta Dr. Nandira Changhkija, Principal Director, H&FW, Nagaland-i sangdong ka nung metetdaktsü.

Department of Health & Family Welfare-i Nagaland nung arishi küm 0 nungi 5 tsüngda aliba tanur lakh 2.3 nem polio jemdaktsütsü atema renema lir. Polio Booths 2,308 nung vaccinator 9,232 aser supervisor 462-i acha-ayanga iba mapa inyaktsü, ta laisa ashi.

January 17, 2016 nü tanur küm 5 ser teküpok alir ajak nem polio mozü jemdaktsütsü ayongzüker aser iba dak sendakba nung osang tejangja metetnürtemi, na anasa aliba Health Centre mesüra district Chief Medical Officer/District Programme Officer (RCH & UIP) den tongteprateptsü akok, ta Dr. Nandira Changkija-isa sangdong nung shia lir.