January 20 nungi e-rickshaw mamshitsü

Guwahati, January 11 (Agencies): Yimti lenmang nung January 20 nungi tenzüka e-rickshaw tem mesenzütsü asoshi Kamrup (Metro) district ketdangsertemi tetuyuba agütsüogo.
Deputy Commissioner M Angamuthu-ia e-rickshaw anishirtem dang parnoki amshiba gari register asütsü metetdakja liasü. Yimti nung e-rickshaw 2,000-shi lir.
“District transport ketdangsertemi e-rickshaw ayokertem dang yimti nung aliba e-rickshaw registration mesüma tashi mayoktsü atema ozüng agütsütsü asoshi ni shiogo. Aibelener lira licence agientsü,” ta regional transport authority chairman aser DC Angamuthu-i e-rickshaw drivertem den senden amenba sülen metetdakja liasü.
E-rickshaw tem register asüba sülen yimti tezülen jajatsü asoshi ketdangsertemisa tuyu.
“Yimti nung passenger tem kümzüka ayutsü aser traffic tajungba nung achaayangtsü asoshi e-rickshaw tem tanga gari manguba tesem nung dang jajadaktsütsü. Passenger tem kümzüka ayutsü atema licence tejangja aliba driver tem dang anidaktsütsü melatsü,” ta Angamuth-isa ashi.
E-rickshaw tesem koba nung jajatsü, iba tesem asazüka yutsütsü asoshi DC-isa transport department nem tetuyuba agütsü.
Iba maparen tekaraba nung atemtsüla, ta All Guwahati E-rickshaw driver union nung Tir, Biren Sharma-i shia liasü.
“E-rickshaw anishirtemi parnok business junga aotsü asoshi department-i tekaratiba nung registration mapatong tenzüktsüla,” ta Sharma-i ashi.