January 23 nungi Netaji file sangdongtsü: PM Modi

New Delhi, October 14 (Agencies): Ato kilonser Narendra Modi-i, Netaji Subhash Chandra Bose dak sentakba file miimbanga alibatem pa (Netaji) asoba anogomung, January 23, 2016 nü nungi tenzüka sangdongtsü, ta metetdaktsüogo.
Bodhbar nü New Delhi, 7 Race Course Road nung Ato kilonseri Netaji’er kinünger parnok 35 ajurua liasü. Parnok den Union Home Minister Rajnath Singh aser External Affairs Minister, Sushma Swaraj nata liasü.
Tanü Netaji’er kinüngertemi Modi dang India sorkar ket nung aliba Netaji indang file tem sangdongtsü akhangba dak sentakba nung ghonda ka shi shisa lemsatepba sülen Modi-i twitter ajanga, pai bendang linük sorkartem danga parnok ket nung aliba Netaji file tem sangdongang ta mepishitsü, ta shiogo.
Modi-i, pai bendang linüktem dangi shidi züluba dang masü saka tanga linük lenirtem ajuruba mapang nunga ibaji süoka jembitsü, aser ibaji December ita Russia linük den jembia tenzüktsü, ta ashi.
“December ita nung iba maparen ya Russia nungi tenzüktsü,” ta Modi-i ashi.
“Puti otsü sota ayutsü nüngdak madoker. Pei puti otsü amadoker linüktemi ibaji yanglutsü tashi malir,” ta Modi-i ashi.
Taoba ita West Bengal sorkari Netaji dak sentakba file 64 tashi sangdongogo. Item file ji Kolkata police aser West Bengal police ket nung liasü, aser ibaji ajanga Netaji’er kinüngertem aser yimtenren lenirtem densema tesem aisülen nungi Centre sorkar dang nüjiso atema rarasang, Netaji indang file tem sangdongtsü takhangba agüja liasü.
“Parnokisa (Netaji’er kinüngertem), bendang linüktem sorkar ket nung aliba Netaji file tema sangdongtsü atema India sorkari ketdangsüa inyakdaktsüner ta mepishiogo,” ta Prime Ministers’ Office-i sangdong ka ajanga ashi.