January 29 nü Kohima District DPDB senden menogo

Kohima, January 29 (TYO): Tanü DPDB indang Conference Hall, Kohima nung Kohima District Planning & Development Board (DPDB) senden Kohima Deputy Commissioner tasenba, Gregory Thejawelie, NCS leniba nung menogo, ta aketdangsertem osang ka ajanga metetdaktsü.
DPDB züngsem ajak tenüng nung ADC Kohima, Lithrongla Tongpi Rutsa-i Kohima DC tasenbam Gregory Thejawelie, NCS aser District Planning Officer tasenba/ Member Secretary DPDB Kohima, Pudusul Luho na Board nung pelaa agizük.
Senden nung DC tasenbai Board züngsemtem den salem lemsatepdang pai, district terenlok atema achaayanga inyaktsü atema DPDB ya tongtibang sabang ka lir, ta ashi.
Paisa züngsem ajak dang lokti ajungkettsü atema maneni amalitepa inyaktsü ayongzük.
Senden nung DPO-ia, züngsemtemi nungita amalitepa inyakba ajanga küm piyong DPDB sentongtem takok ngua inyaktsü imlar, ta ashi.
Taoba mapang lemtetba onüktem reprangshidang society tesentem registration dak sendakba nung EE PWD (South), Er. Vizotuo Seletsu-i school tasentem registration ajanga traffic timtem aser parking facilities tebilemtsü , iba denji külemi jila nung
painting mapa atema benoka ajembi.
DC-i, society tasen atema registration ji sorkari lateta alibatem nung ajemdaker inyaktsüla, ta shia tim departments dang EE PWD-i benokba ama jila nung lenmang tiplen painting atema telatetba kar renemtsü mepishi.
Govt. Hr. Secondary School, Tseminyu aser T.M Govt. Higher Secondary School, Kohima nung Science Stream tenzüktsü dak sendakba nung züngsemtemi ibaji agizüktsü atema sorkar matsüngdang benoktsü lemteta liasü.
DC-isa, February ita nung Mini Hornbill agitsü, aser state yimtiba ama iba abenjung kanga temjena agitettsü atema DPDB züngsem ajaki amalitepa inyaktsüa metetdaktsü.
Taruba DPDB senden nung E.E. PWD-i departmental osang metetdaktsütsü.