January 3 nü GPRN-i Naga Army Day anogomong among

Dimapur, January 03 (TYO): January 3, 2018 nü General Head-Quarters nung Naga Army Day anogomong mongogo; iba sentong nung tongti tesemdangerji convener, steering committee NSCN, Rh. Raising liasü aser tetushi tejaokertemji kilo kilonser, Inno Hukavi Yepthomi aser VC, Keya Kilonser Lt. Gen. (Retd) NG Markson na liasü, ta tanü GPRN MIP sangdong ka ajanga metetdaktsü.
Iba anogomong sentong nung collective leadership nungi Ape Venuh densema Civil aser Army wing naprong nungi tongtibang nisung aika aden.
Lt Col. Pitovi, A.O. Chaplaincy, GHQ leniba nung tetenzük sarasadem agi, iba sülen Naga nunger atema taküm tenla agüja asürtem ajak bilemteta akhüm agüja mokrema liasü.
Onük jembidang Rh. Raising-i, Naga Army ya military army ka dang masü saka yimtenren army aser Nazirites lir, ta ashi.
Kilo kilonser Hukavi-ia, Naga army ya sorkar tongtiret lir, ibaji medenibo sorkar mapa meinyaktettsü, ta ashi. Paisa Naga Army dang matsüngshii nokdaktsü atema tejakleni aotsü aser linük atema pei melungsentsü aser tanela ajak tenla agütsütsü ayongzüka liasü.
Taoba mapang Naga Army nung Longvibu, Lt. Gen (Retd) NG. Markson-i, Naga Army ya kanga tongtibang; linük aser nüburtem kümzüktsü atema Naga Army ya tashitait jara ka mesüka lir, ta ashi.
Paisa, ceasefire ya Naga linük talenba nungi salatsü atema taküm tenla agüja nokdakertem ajanga lir, ta ashi.
Tatemsa Longvibu, Anthony Ningkhan Shimray-i iba sentong nung adener tongtibang nisungtem aser züngsemtem dang pelaba lemsatep.
Paisa, Naga Army ya temelenshi adokdaktsür sepaitem lir, lenmang yanglurtem aser Naga National Movement tamendakdak lir, ta metetdaktsü.
Paisa Naga Army ajak dang Khrista atema sepai kaka asütsü, pei tenangzükba ataloktsü atema hadir kaka asütsü, nisung o Tsüngrem tsüngdang azüngashiba mamatoktsü aser linük atema ochishia alitsü ayongzüka liasü, ta sangdong nungsa shia lir.