January 8 nü tashi nung ‘Pabuk’ agi Andaman & Nicobar Islands kongshitsü

New Delhi, January 05 (Agencies): Yipru mopung tesashi ka Andaman & Nicobar Islands tsütsüleni aonba nung ajemdaker ketdangsertemi tekümdangtsü osang metetdaktsüogo, ta tanü Home Ministry-i metetdaktsü.
‘Pabuk’ ta ajaba yipru mopung tesashi ajanga Andaman Islands, Andaman Sea aser Bay of Bengal temeket tesemtem nung January 7 nü tashi tzüsem tulu alitsü, ta home ministry ketdangser kati metetdaktsü.
India Meteorological Department (IMD)-i Andaman Sea aser Bay of Bengal nung January 5 nungi January 7, 2019 tashi angopui maotsü metetdaktsüogo.
‘Pabuk’ yipru ya Gulf of Thailand nung kümteta liasü aser west-northwestwards tsütsülemi ghonda ka nung kilometer 10 tekara ona tang Thailand aser temeket nung lir, ta paisa ashi.
January 8 tashi nung Bay of Bengal, Andaman Islands aser Andaman Sea nung iba yipru kanga tesashiba akumtsü, ta paisa metetdaktsü.
Amongnü tashi Nicobar Islands nung tzüsem tulu alitsü, aser Andaman Islands nung nüburtem dang kümküma alitsü osang metetdaktsüogo, ta paisa ashi.
Ano Weather department-ia Andaman Sea aser Bay of Bengal nung January 7-8 anogotem nung angopui maotsü metetdaktsü.
“Iba yipruji west-northwestwards tsütsüleni aontsü aser tanü Andaman Sea atongtsü. Iba sülen northwestwards tsütsüleni ona January 6 nikongdang tashi nung Andaman Islands atongtsü. Iba mapang nung yipru mopungji ghonda ka nung kilometer 70-90 tsüngda tekara asutsü,” ta ketdangseri metetdaktsü.
Iba yipruji north-northwestwards tsütsüleni aontsü aser northeastwards tsütsülen Myanmar tsüyimkümleni aontsü aser January 7-8 nung yipruji süngjemtsü.