Japan: 2 buba menoknok lendong nung 19 asü

Japan anülulentip tsütsülen, Kumamoto prefecture nung menoknok anokba sülen firefighter ketdangsertem ki jirepdak mapa inyakba noksa nung angur. (Kumamoto, April 16)

Tokyo, April 16 (Agencies): Anogo ana tsüngda nung menoknok tesashi anaben tashi anokba sülen Japan Ato Kilonser, Shinzo Abe-i par miktar aser lendongtsüdong nung yariteper ketdangser tali par linük anülulentip tsütsüleni yoksemogo.
Yashi menoknok anokdak, Kumamoto yimti anasa menoknok tanabuba tanü, Honibar nü anokba sülen tang tashi nung ishiba agi nisung 19 asüba osang jangaogo ta ketdangsertemia metetdaktsü.
Tanü anokba menoknokji magnitude 7.0 tesashi aliba aser iba sülen ali maneni magnitude 5.4 tesashi anokba osang ka Japan’er Meteorological Agency-ia metetdaktsüogo.
“Rescue ketdangsertemi lendong ajururtem kümzüka anitettsü maparen teinyakdak lir,” ta shia, tan lendong nung nisung asüba osangji tang dang nungi timba akümtsü akok ta ketdangsertemisa metetdaktsüogo.
Tan menoknok anokba sülen Kyushu asetkong nung tenetba ki aika anenzüka aluba aser gari senzüba tongti highway anenbangba osanga angazükogo.
Ano, Minamiaso yimtsüng den sentaktepba tongti apu jirepba ajanga ketdangsertemi lendong atalokdak tonga aotsüren nung tetsükdakba ajurua lir.
Abe-ia yashi menoknok tesashitiba anokdak semdangtsü asoshi sentong renema liasü saka tanabuba menoknok anokba sülen iba sentongji thinenogo.
Tang tashi nung mitkar züngsem 1,600, police ketdangser 2000 aser firefighter ketdangser 1,300 shi tan lendong atalokdak tonga oa idakji nüburtem den yaritepba osang jangjaogo.
Tan menoknok anokba sülen ali maneni 140 ben den timba anokba osanga bushitetogo.