Japan aser China na sen tsütsü tangatettep akhangshir

Tokyo, May 7 (Agencies) : Japan aser China na tsüngda sen tsütsü amalitepa tangatettep nung inyaktsü aser linük ana rongsenkettsüng den inyakyim balala nung tesendaktep tashi itshitsü asoshi olemtep senden ka kaogo.
Asian Development Bank (ADB), 50buba annual senden akaba mapang linük ana nungi finance minister tem Honibarnü Yokohama nung ajurutep. Iba senden ya Deobarnü tembangtsü, ta osang ajanga ashi.
Taro Aso aser China nungi finance minister, Xiao Jie na den linük anaprong idang central bank tem nung inyakertem-i Japan aser China na tsüngda sen dak sendakba maparen tali tashi itshitsü aser renlokdaktsütsü asoshi amalitepa inyaktsü bangjem.
“Linük anaprongi rongsenkettsüng yanglushitsü nüngdakba angatet,” ta kilonser ana jagi külem sangdong ka ajanga metetdaktsü.
2015 küm tesüsa amenba sürbo Honibarnü senden amenbaji mezüng senden liasü. Parnoki ano 2018 nunga senden ka amentsü sentong renemogo.
2006 küm nungi ADB senden akaba mapang ongdang agiteta Japan aser China na tsüngda sendensa mena arur, ajisüaka East China Sea nung aliba asetkongtem asoshi linük ana tsüngda mangatettep adokba ajanga iba inyakyimji yaküm khen anena ata.
2012 nung Japan-i shinga maliba asetkong, Senkaku Islands parnok meyong aküm. Iba asetkong dang China-i Diaoyu Islands ta ajar. Japan-i iba asetkong agiba ajanga China nung longkak kanga sashia ait aser küm ka lir küleni East China Sea nung tayimtsü senzüsempongba nokdanga liasü.