Japan aser IOC-i Tokyo Olympics thinentsü mulungtepogo

Tokyo, Metsüremi/March 24 (Agencies): Japan Ato Kilonser Shinzo Abe-i Mongolbarnü ashiba agi, pa aser International Olympic Committee tekolakba nati Tokyo Olympics küm ka agi thinentsü asoshi mulungtepogo.
Coronavirus tashidak pokteter aliba ajanga tebilemtsü kaa aliba mapang ka nung IOC tir Thomas Bach den iba asayamung thinentsü asoshi phone ajanga sensak asemba sülen Abe-i iba osang osangbenertem nem agütsü.
“Asayartem tensa tajungtiba nung asayatsü aser terprangertem atemaa tekümzükba agütsütsü asoshi onoki tir Bach dang iba asayamung küm ka agi thinentsü asoshi asadangtsü asüngdang. Tir Bach-i asayamung thinentsü asoshi noklang noklang mulung agizker ta shiogo,” ta Abe-i ashi
Küm 124 tsüngda Olympics khen danga thinena mali, saka 1916, 1940 aser 1944 küm alima rara mapang thiogo.
Iba tashidak prokshiba mapang tashi nungbo Tokyo renemadoker liasü. Ita aika asayamung ya sentong yanglua aliba ama asayatsü ta shia aruba sülen Abe-i iba hopta, asayamung rangben masayatettsüsa kümra thinentsüsa dang akümtsü, ta ashi.
Kasa mapang nung Tokyo Governor Yuriko Koike-i osang benertem dang ashiba agi, iba asayamung 2021 küm asayatsü saka “Tokyo 2020” ta dang ajatsü.
Anogo ishika tejakdanga IOC, Tokyo organising committee aser Japan sorkari Olympics thinentsü asoshi kecha sentong mali ta shiogo, kechiyong iba asayamung tenzüktsü ita pezü anunga lir.
Ajisüaka Canada aser Australia-i July ita Japan-i parnok asayartem meyoktsü ta sangdongba aser British o French sorkari IOC dang telemtetba ka takaritiba nung agitsü mepeshiba sülen iba telemtetba agitsüsa aküm. US Olympic aser Paralympic committee-ia tashidak pokteter aliba ajanga training junga magitetba aser qualification inyakyim nung timtem adokba tebilemtsü kaa lemsatepogo.
Brazil, Slovenia aser Germany Olympic committees, USA Swimming, USA Track and Field-ia asayamung tanga mapang ka nung agitsü asoshi khangogo.
Ajisüaka Indian Olympic Association-i ashiba agi, parnoki telemtetba ka agitsü asoshi ita kabosa atasaa atatsü ta metetdaktsüogo.
Hombarnü IOC züngsem Dick Pound-i, parnoki Olympic küm ka thinentsü asoshi telemtetba agiogo, ta ashiba sülen asayamung thinenba osang sangdongtsü imlaa liasü.
Pound-i ashiba agi, iba osang sangdongtsü asoshi IOC aritepa maliasü, ajita asünung dang parnoki Japan, sports federation tem aser sponsor tem nem tanga sentong ka agütsütettsü.