Japan Ato Kilonser, Abe-i New York yimti bushia ogo

Tokyo, November 17 (Agencies): Tawa US Tir election nung takok ngua, US Tir tasenba akümtsü temeten angusang, Donald Trump den ajuruteptsü nükjidong nung Japan Ato Kilonser, Shinzo Abe-i US kübok New York yimti bushia tanü, Brehostibar nü ayamesogo.
Abe-i New York tonga aoba sülen Trump den ajuruteper mezüngbuba bendang linük ka lenisang akümtsü renema lir.
Billionaire yimsüsür, Trump-ia Abe New York yimti kübok Trump Tower tesepti nung agizüka, pa den senden amentsü renemba osang angazükogo.
“Alima ajunga nung US Tir tasenba akümtsü temeten angusang, Trump den tsüngdong ajuruteper lenir mezüngbuba akümtsü maongka anguba atema kanga pelar. Trump den ajurutepa senden amendang ozü linük anati aroki lungjemer tarutsü mangdangtem asangsang nung ajangzüktsü onük benoka jembitsü sentong lir,” ta Abe-i Tokyo kübok Haneda tayimtsü anendak toktsüba jakdang metetdaktsü.
“Japan aser US na sentaktepa alibaji ozü Japan linük kümzüka ayutsü tamendakdak lir. Ozü linük ana tsüngda temulung lemtep aliba ajanga dang tesendaktep junga alitsü. Anungji, ni Trump den aroki lungjemer alima nung yimji yimjung aser terenlok lidaktsütsü atema inyaktsü jangrar,” ta pai shisem.
Trump-i tan November ita 8 nü election nung takok anguba sülen China Tir, Xi Jinping aser Russia lenisang, Vladimir Putin na densema, alima linük lenir aikati Trump den telephone ajanga jembiba osang bushitetogo.
Ajisüaka, Trump den tsüngdong ajuruteper alima lenirtem rong nung Abe mezüngbuba akümtsü lir.
Trump-i meimlaba onük aser osangtem sangokja aruba yong European Union (EU) aser North Atlantic Treaty Organization (NATO) densema, alima ajungai tang tebilemtsü akatsü tenzüka lir.