Japan, China aser South Korea den Pompeo-i sensaksemtsü

Washington/Tokyo, Mongputeni/October 6 (Agencies): US Secretary of State Mike Pompeo-i East Asia semdangba nung shilem ka ama Küptoknü Tokoyo tongogo. North Korea nem nuclear weapons toktsüdaktsütsü asoshi ajungshitsü nükjidong yur pai East Asia semdanger.
North Korea-i mao tsüngda Tokyo nung ketdangsertem den sensaksemtsü asoshi Pompeo Tokoyo Küptoknü tonga aruogo.
Pa Japan Ato Kilonser Shinzo Abe aser Foreign Minister Taro Kono na den ajurutepa Amungnü Pyongyang-i maotsüngda North Korea nunger policy dak sendakba nung sensak asemtsü aser iba sülen South Korea o China na semdangtsü.
Rogonü osangbenertem den sensaksemba mapang Pompeo-i, taküm küm tetenzük nung Singapore nung tir Donald Trump aser North Korean lenir Kim Jong-un na ajurutepba mapang tenangzüktepba yangluba tem benoka aotsü asoshi aser telok anapronglai ajangtettsü merangba ken o angatetteptsü asoshi pai iba linük semdanger, ta ashi.
Paisa, parnoki Trump aser Kim na tanaben ajuruteptsü asoshi mapang aser tesem asoshi benoka jembitsü mesera tembanga jembitsü, ta ashi.
Trump aser Kim nati Aami/June nung “denuclearization” dak sendakba nung tenangzüktepba ka yanglu saka iba ya takok ngua inyaka aotsüba dak sendakba nung ken o tejakleni bener moteti lir.
Pompeo-i North Korea tatemsa semdangba mapang kecha telemtetba ka magi aser pai ozüng raksar teloktemi takhangba agütsüba ama agütsür ta shia Pyongyang-i pa aitsü.
North Korea-i tang tshi nung nuclear aser missile tendangba anenogo aser America nunger tepuokdak yua alir asem chiokba den nuclear test site nung missile engine facility indang parts tem atongsaogo aser tunnel entrances atongsa tenzükogo. Ajisüaka parnoki missile mesera nuclear yangluba sentong anentsü asoshi jenjang kecha magi.
Tawa North Korea-i nuclear weapons metoktsü tashi international sanctions benoka atatsüla ta nenshba atema Pompeo-i North jashidaktsü.
Rasemnü pai ashiba agi, taoba hopta UN General Assembly nung linük ajaki iba ken o pusemogo.