Japan den yimjung

Japan nunger o Naga nungertem na tsüngda kodanga merara aser metsükchitep saka  taidok meshiteptsüsa atalokbaji talisa tanü lanurtem asoshi tatalokba otsütemji tebushidangnütsüka kümogo. Atangji, Japan nunger o Naga nunger naji mapa kecha nunga medemdangtsü makok, tenaji ali o anüng na amato lir. Japan nungerji tashitemeteter aser takar saka Naga nungerbo kecha memetet aser sensaker. 1944 küm Japan nunger Kohima tashi rarayonga aruba mapang Naga nungertembo ano shiruru amai lia liasüba tia nung liasü. Ajisüaka, British nungertem den raratsü asoshi Naga lima tashi arudaktsübaji tarutsü anogotem asoshi Tsüngremer sentong alitsü südi ta bilemer. Aji oda, alima tanabuba rara nung Kohima nung British nungertemi aniba telok o Japan nunger sepaitem na kanga sashia raraba otsü ya asenok asoshibo tang tashi tesüngmangtsüka lir. Tanü asenoki Japan aser England tonga moutetter saka küm 70 jakdang, British nunger aser Japan nunger sepaitem na prongla Kohima tashi raraa arutetba tashi, tangatetba aser temulungtetbaji kanga tulu liasü ta asenoki angatetter. Kin anapronglaji pei lima nungi raraa apusoba Kohima atong tashi nung rongsen kwika endoker alitsü aser nisung taküma kwika samar alitsü ta bilemer. Ano, kin anaji dang masü saka tena den adener tangar kintema aika akoksadaktsüogo. Aji oda, alima tanabuba tongpang rara nung Japan nunger o British nunger na Kohima nung raraba ajanga Naga nungertema ka den mesüra ka denbo adentsüsa tensa mapang agi menepa adok. Iba mapang nungji British nungertembo Naga lima nung telidak asünungji Naga nungertemi parnok yari aser Japan nungertem anema apuso. Pei lima toktsür joko mapang talangka tesem balala nung raraa aruba sepaitem asünungji Japan nungertem aika chiyongtsü maka kanga timtema Kohima atong ta angazüker. Idangji, Naga nungertemi parnokji aika tepset aser parnokia Naga nunger aika tepset ta mapang tatsüka tsüngdaji kecha kuli tajung ka melii ajungben chilok ka amai Naga nunger o Japan nunger na tsükchiteptsüsa aküm. Iba mapang malir aser mangurtemibo item tatalokbaji shishia mebilemtsüa akok, saka asen lima nung asenoki kecha kuli tajung melii tangar bendangertem tepsetbaji asenok aibelen tuluka asütsü. Atangji, 1944 küm tashi nungbo Naga nungertema Naga Club tenzüker 1929 kümbo British nungertem dang Naga nungertembo tangar bendanger yimsüsüba kübok melii peisasa yimsü süa dang linür ta asüba yimten tangatetba ken o kabo agütsür liasü. Iba shidiji Naga nungertemi Simon Commissiom nem agütsü. Iba tangatetba nung lia alima tanabuba raraba osangji radio nungsa angaa aliba mapang ka Japan nunger Kohima tashi aru. Ashiko, ibaji Naga nunger asoshi taoksatsüka sür alitsü, anungji British nungertemi Naga nungertemi aginüba ama peisasa yimsü süa alitsüsa yimten  tashi balala parnok nem agütsütsü südi ta bilemer Bitish nungertem pu asem aser Japan nung anema nokdak südi. Idangji, Naga nunger asoshi nüngdak maliba tongpang ka nokdaktsüsa aküm aser Japan nungertem den arr ayim. Atangji, tang tashi Japan nunger tong;pang nung nokdaker chirnurtemi Naga nunger dang kanga jashia alitsüa akok. Item ajakji rajema tang Japan lima nungi Tsüngrem tenzükertem aruagi Kohima nung Naga nungertem den taidok meshitepa yimjung yanglubaji Tsüngremer sentong ka asütsü ta amanger. Aji oda, tanü Japan o Naga nunger na taidoktepba temoatsüji arogoi anir kin ana ya alima nung kibong ka chir ama küma kati ka dak temulung doka Tsüngremer tenyaba mapa den repsema alima shisatsü aser rongsen renlokdaktsüba mapatem nung yaritepa inyaka aotsü imlar.