Japan den yimjung tezüngzüktep agitsü kanga dang tasak: Lavrov

Russia Foreign Minister, Sergei Lavrov (Abelen)-i Japan Foreign Minister, Fumio Kishida (Achijilen) den Russia yimtiba, Moscow nung senden amenba noksa nung angur. (Moscow, December 03)

Moscow, December 03 (Agencies): Japan den mapang talangka benshia aruba ali lushi den sentakba mangatettep ken o bentetta yimjung tezüngzüktep agitsü maparen kanga saka aliba osang ka Russia Foreign Minister, Sergei Lavrov-i tanü, Honibar nü metetdaktsüogo.
Lavrov-i Japan Foreign Minister, Fumio Kishida den Moscow yimti nung ajurutepa senden ka amenba sülen osangbener den ajurutepdang tanü iba olenji sangoktsü.
Par linük ana tsüngda adokba mangatettep ken o benoka jembitsü nükjidong nung Russia Tir, Vladimir Putin-i Japan semdangtsü hopta ishika anünga alidang par linük ana nungi Foreign Minister anati tan tsüngdong ajuruteper lir.
Soviet Union mitkartemi tesüiba mapang, World War II (WWII) mapang tashiyim agi agiba Pacific tzüyim anülulen tsütsütsü densemba asetkong den sentakba ken o mebenteti aliba ajanga Japan aser Russia na tsüngda tanü tashi tesendaktep junga meyuteti lir.
“Ozü linük ana tsüngda yimjung apu alatsüji kanga dang tasak. Tetsükdaktsü jenti ajuruaka, ozü linük anati mangatettep ken o ajunga benteta, tanaben sentaktepshitsü alizüng aser nükla lir,” ta Lavrov-i ashi.
Putin-ia Japan Ato Kilonser, Shinzo Abe den Russia anüdoklen, Vladivostok yimti nung taküm September ita ajurutepa, par linük ana tsüngda mangatettepbaren bentettsü aser tanaben sentaktepshia arok rongsenren tajangzük alitsü nükjidong nung Japan December ita semdangtsü sentong renema liasü.
Ano külen, par linük ana tsüngda adokba mangatettep ken oji ajaki agizüktettsüsa jembitepba ajanga bentettsüsa inyakteptsü tayongzükba olen ka Kishida-ia metetdaktsüogo.