Japan & France nati Asia-Pacific nung US lenisüba pela agizüker

June 3, 2017 nü Singapore nung 16 buba IISS Shangri-La Dialogue nung South Korea Defence Minister Han Min-koo, U.S. Secretary of Defense James Mattis aser Japan Defence Minister Tomomi Inada nungertem teka amteper agiba noksa ka angur.

Singapore, June 3 (Agencies): US lenisüba kübok Asia-Pacific nung North Korea indang nuclear maparen azüoktsü merangba aser iba tesem nung yimjung atema mapa inyakba pelashishia agizüker, ta Japan aser France nung defence minister temi tanü metetdaktsü.
America-i Asia-Pacific nung mapa inyakba aser North Korea anema nokdakba atema Japanese Defense Minister Tomomi Inada-i pelaba ashi.
“United States ya mapang talangka tejakdang nungi Pacific nung tashi ka lir. Indo-Pacific nung yimjung alitsü aser tensa meraksatsü atema United States-i maneni akhüm agüja mapa inyaker. US-i mapa tajung inyakba onoki pelaa agizüker,” ta Inada-isa shisem.
“Japan-i Trump sorkar den tesentaktep akangshir aser tali amalitep alitsü meranger. North Korea ajanga lendong bener arutsütsü khuretji ulura, anungji asenok longjemer North Korea azüoktsü atema inyaktsüla” ta paisa metetdaktsü.
North Korea ket nungi nuclear weapons ajak agientsü atema mapa inyaktsü mulunga lir aser iba nung mitkar tashi amshitsü akok, ta US Secretary of State Rex Tillerson-i taoba mapang metetdaktsüogo.
Honibarnü US Defense Secretary Jim Mattis-i ashiba agi, “North Korea-i United States aser tanga linüktem amokmerentsü atema nuclear-armed missile ka yanglutsü merangba nung lendong tulu keta lir.”
Singapore nung ayonga agiba Shangri-La Dialogue nung Mattis-i linük 39 nungi defense ministers aser mongin nisungtem den o jembi.
Putu 21 buba nung nuclear tests agiba linükji North Korea dang lir aser yaküm kija parnoki anaben tashi nuclear tests asü, ta French Minister for Armed Forces Sylvie Goulard-ia ashi.
“North Korea inyaksangshi ajanga tesem nung tensa mejungi kümdaktsür aser mepetmesü adokdaktsür. Iba tesem nung onoki rongsentkettsüng maparen tulu inyaker aser linük o linük tsüngda rara madokdaktsünür” ta Goulard-isa shisem.
US-i Asia-Pacific nung lenisüba ajanga South China Sea nung senzüsenbongtsü nüjiso angur aser ozüngtem meraksar, ta linük anaprong nungi defense minister temi ashi.