Japan-i Hiroshima lendong ataloker küm 70 abensaba bilemteter

 

Japan senso meyirijang aikati Hiroshima yimti nung tentetba Hiroshima Peace Memorial Park nung agiba atom bomb pokdaktsür küm 70 abensaba bilemteta amongba sentong nung shilem agiba noksa nung angur. Kasa tesem nung Atomic Bomb Dome renema aliba noksa abelen angur. (Hiroshima, August 06)

 Tokyo, August 06 (Agencies): United States-i World War II (WW II) tatembanglen Japan kübok Hiroshima yimti nung atom bomb tsükdakja tebang agi meshitetba lendong tulu atalokdaktsür küm 70 abensaba bilemteta Japan-i tanü Hiroshima nung mongogo.

Japan senso meyirijang aikati atom bomb tsükdaktsüdak tentetba Peace Memorial Park nung sentepa minute 1 ola madoki asür akümtsübo agüja liasü.

“Tongpang nung amshitsü nuclear bomb-i meimchirtem nem tebang agi meshitetba lendong bener arutsür. Anungji, alimai nuclear bomb yanglua rizüngba maparen agientsüla. Yamaji inyakba ajanga meimchirtem sünepa taküm litettsü,” ta Hiroshima Mayor, Kazumi Matsui tanü metetdaktsü.

“Alima ajunga nung atom bomb pokdakja amakba linük kija Japan lir,” ta shia, alima ajunga nung nuclear bomb yanglua rizüngba maparen agientsüji Japan’er khuret aliba olen ka Japan Ato Kilonser, Shinzo Abe-ia tanü sangoktsü.

“Iba alima ya nuclear bomb maliba lima ka kümdaktsütsü asoshi asen linüki United Nations (UN) nung onük benoktsü nangzüker,” ta pai ashi.

Atom bomb pokdaktsüba sülen Hiroshima nung alir nisung 140,000 shi bomb apokdang aser tesülen radiation miim ajanga asüba osang bushiteta lir.

Hiroshima nung bomb pokdaktsür anogo 3 süir külen Japan tzüyimkümlen tentetba Nagaski yimti nunga atom bomb tanga ka pokdaktsüba ajanga iba yimti nung alir nisung 70,000 shi asüba osang bushitetogo.

Tanü Hiroshima yimti nung agiba sentong nung Japan-i yokba US ambassador, Caroline Kennedy; US Under Secretary, Arms Control & International Security, Rose Gottemoeller na den külemi, alima linük 100 dak tema nungi ketdangsertemi shilem agia liasü.