Japan-i India nung sen intoka inyaktsü maongka aika lir: PM Modi

Tokyo (Japan), November 11, 2016: Hokolbarnü Kentei (Japan) nung India Ato kilonser, Narendra Modi aser Japan Ato kilonser, Shinzo Abe nati osangbenertem senden ka nung külemi jembiba noksa nung angur. 

Tokyo/New Delhi, November 11 (Agencies): Japan nunger investor temi India nung sen intoka inyaktsü ajungshia tanü Ato kilonser, Narendra Modi-i, India linük ya alima nung rongsenkettsüng atema tesademtiba linük akumtsü nükjidong nung sorkari mapatong balala benoka inyaker, ta ashi.
Tanü Tokyo nung India-Japan Business Leaders’ Forum senden nung jembidang Modi-i sorkar indang Goods & Service Tax (GST) indang, investment atema mapatong balala benoka inyakba aser India nung shishilembaba temelaba akumtsü atema inyakbatem metetdaktsü.
Modi-isa, ‘Make in India’ tajungba akumtsü atema sorkari maneni mapatong balala benoka inyaktsü, ta metetdaktsü.
“India-i rongsenkettsüng tsütsü lenmang tasen ka nung jajadar. Kü telemtetbaji- India ya alima nung rongsenkettsüng tesademtiba linük ka akümtsü atema lir,” ta Ato kilosneri ashi.
India nung rongsenkettsüng atema inyaktsü lenmang sadema lapoka lir aser Japan nunger company temi India nung sen intoka inyaktsü maongka jenti lir, ta metetdaktsü.
“Terenlok tsütsü onoki aika tongtetogo,” ta paisa ashi.
“India nung software ajungbaji Japan’er hardware-i züngshir. Iba ya ajanga onoki maongka jenti agütsütsü,” ta pai business lenirtem dang metetdaktsü.